Temsîlkarîya Almanya ya Rayberîya Xosera Surîyeya Rojhelat û Vakûrî, Hukimata Almanya ra mektubêk erşawit, mektub de ame vatiş ke Surîye ra vetişê îşxalkar Dewleta Tirk ser o hetkarî bêro dayiş û bi çimverîya dewletê mîyanêneteweyî zî mintiqayêka bi ewle bêro awankerdiş.
Mektub de wina ame vatiş: “Efrîn, bajarêko bi ewle û xuzir o. Bi hêrişê Dewleta Tirk û çeteyê ci, xuzir û ewleyî nêmend bajarî de. Dewleta Tirk, demografîya bajarî bedilnena û cayê şarê xocayî, çeteyan ca kena. Dewleta Tirk û çeteyê ci, modelê Rayberîya Xosere hedef girewtê, nêwaştî ke Surîyeyêka demokratîk bêro awankerdiş. Peynîya hêrişê Dewleta Tirk, bi seyan kesê nêçare bajarê Şehba û mintiqayê bîn ra koç kerdê, her roj koçberan ra hêriş yenê kerdiş.”
Mektub de bal antiş projeyê Dewleta Tirk ê newe ra ronayişê Dewleta Osmaijan û wina ame vatiş: “Çend ra heme hêriş û îxlalê Dewleta Tirk bi belgeyan ameyî aşkerakerdiş, Dewleta Almanya eşkena çareserîya krîzê Surîyeye de rol biga ser xo. Qewetê ekonomî û sîyasîya Almanya dest dona. Ma omid kenê ke Hukimata Almanya rolê xo do kay biko.”
Ebdî; Ma Efrînî ra fek veranêda
Fermandarê Pêroyina QSDî Mazlum Ebdî zî seba serrgêra îşxalî ya Efrînî ser o hesabê xo yê twîttîrî ser o aşkareyêk da û vat ke Efrîn serekeya înan o, rasteyê mîyannêteweyî de xebat kenê ke şarê xocayî yê Efrînî bajarê xo ra biagêrê û çeteyan zî Efrînî ra bivejê û aşkera kerd ke her roj Efrîn de sûcê şerî yenê kerdiş û vindarnayişê nê sûcê şerî zî wezîfeya komelê mîyanêneteweyî ya.
AMED