9 eyaletanê Almanya de dersê elewîtîye dîyenî wendekaran. Mamostaya ke ders dana, dîyar kerde ke dîyayîşê dersê elewîtîye zaf muhîm o û wina dewam kerde: “Destpêk de keyeyî etirîyayênê, labelê badê ke dîyî ke wendekarî xora bawer kenî, o wext eleqeyê keyeyan zêdîya. Ganî ma ber bi ber bigêrî û keyeyan îqna bikerî.”
ELÎF SONZAMANCI / ZEYNEP GUL / PÎRHA / HAMM
Almanya de serra 2007 ra nata dersê elewîtîye bi hawayo fermî mekteban de yenî dayene. 9 eyaletanê Almanya de wendekaranê verdibistan û dibistanê mîyanênan rê dersê elewîtîye dîyenî.
Bajarê Hammî de bi hetkarîya Cemxane û Komela Kulturê Elewîyanê Hammî dersê elewîtîye yenî dayene. Mamosta Meltem Guven Ergune dersan dana û Sereka Cemxane û Komela Kulturê Elewîyanê Hammî Gulay Sonmeze zî hetkarîye dana Ergune. Ergune û Sonmeze babete ser o qisey kerdî.
Mamosta Ergune va ‘Almanya de dîyayîşê dersê elewîtîye seba ma zaf muhîm o’ û wina domnaye: “Xora domanê ma beşdarê dersanê tirkî yê bawerîye bîyênê. Neke domananê ma do mecbûr bimendêne beşdarê dersa îslamî bibîyêne. Seba ke merdim bişênbo dersê elewîtîye bido, ganî mamostayo/a kadroyin û karmend bibo.”
Domanî eslê xo meraq kenî
Mekteban ra ver Cemxane û Komela Kulturê Elewîyan yê Hammî de dersî dîyayêne. Badê ke mekteban de dîyayîşê dersan dest pêkerd, wendekarî bi hawayo komkî şonî Wîlhem-Busch-Schule. Mamosta Ergune wina va: “Seba sinifêk, ganî 12 wendekarî bibî. Hertim merdim nêşêno 12 wendekaran têhet de bivîno. Nika dûştê verdibistanî de 23 wendekarî, dibistano mîyanên de zî 25 wendekarî estî. Eleqeyê wendekaran baş o. Wexto ke ez dest bi derse kena, ez wendekaran ra rizatîye gêna û înan ra persê ‘Gelo çîyo ke şima wazenî vajî esto?’ kena. Wexto ke derse qedîyena ma înan rê Homayî ra rehetî û Xizirî ra hemratîye wazenî. Ma wendekaranê neweyan rê persê ‘ez kam a, kura ra yena û eslê ma kura ra yeno?’ reyde dest pêkenî. Wendekarî eslê xo meraq kenî.”
Ganî merdim keyeyan îkna bikero
Ergune dewamê qiseykerdişê xo de qala nizdîbîyayîşê keyeyan kerde û wina va: “Ge-ge wendekarî persanê ecêban pers kenî. Ma mecbûr benî ke anagoreyê famkerdişê înan cewab bidî. Labelê ge-gane wendekarî cewaban ra îqna nêbenî. Destpêk de keyeyî etirîyayênê, labelê badê ke dîyî ke wendekarî xora bawer kenî, o wext eleqeyê keyeyan zêdîya. Tîya de çîyo kêm o yo ke ganî keyeyî bêrî îqna kerdene. Ganî ma ber bi ber bigêrî û keyeyan îqna bikerî.”
Dêsî ser o tarîxêk ame neqişnayene
Sereka Cemxane û Komela Kulturê Elewîyanê Hammî Gulay Sonmeze zî qisey kerde û wina va: “Ma komela xo de seba wendekarê ke beşdarê dersanê elewîtîye benî, aktîvîteyan virazenî. Ma nê dêsî zî domanan rê aqitna. Ma her serre tetîlî ra ver tay organîzasyonan virazenî. Embazêko resam ame û nê dêsî amade kerd. Ma kêfweşîya domanan dî û nê dêsî ser o tarîxêk ame neqişnayene.”