Kursî bê pere yenê dayîş û semedê kursan muracatî dewam kenê.
Atolyeyanê şaredarî de kursê sey Tekstîl (Makînakarîya Deştişî ya Duze), Tesewûrê Moda, Tesewûrê Çî-mîyê zîynetî, Neqişkerdişê Şalan, Çulagkerdişê Xalîyan, Miqatekerdişê Gijikî û Kuaforî, Miqatekerdişê Cîldî û Makyajî, Çiraxîya Nanpewjî, Programê Xêzkerdişê Autocadî, Tembûre, Koroya Ciwanan, Çînî, Gîtar, Erbane, Seramîk, Boyaxo Rûnin Tablo, Teknîkê Xêzkerdişê Qelema Sîya, Riştena Sepeta Xasire, Xebitnayîşê Kerrayan, Heykeltiraş, Viraştişê Tîtikanê Axşapan, Fuzyono Cam û Perwerdeyê Kurdkî yenê dayîş. Kursî bê pere yenê dayîş û semedê kursan muracatî dewam kenê.
Peynîya hewteyî de zî kursî akerde yê
Goreyo ke eşkera bi peynîya hewteyî zî kursî akerde manenê. Mudira Şaxa Perwerdeyê Meslekî Turkan Turane derheqê xebatan de zanayîş da û wina va: “Kursê ma mîyanê na aşme de abîyî. Esmer 23 beşan de kursê ma estê. Semedê kursan muracatî hema zî dewam kenê. Kesê ke wazenê beşdarê nê kursan bibê, eşkenê Mudirîya Şaxa Perwerdeyê Meslekî ya ke Sumerparke de ca gêna rê muracat bikerê. Mîyanê hewteyî de her tim kurs yeno dayîş, la kesê ke mîyanê hewteyî xebitîyenê semedê înan peynîya hewteyî zî perwerde yeno dayîş.
Turane da zanayîş ke wendekarê ke serra par beşê resimî de wendêne dima ra îmtîhanê unversîte de bîyê serkewte û wina dewam kerd “Tena semedê îmtîhanan ney, semedê averberdişê kabîlîyetî zî feydeyê kursan esto. Kursê ma hem semedê averşîyayîş hem zî semedê îstîhdamî feydeyîn ê.”
AMED