Newalê Munzur û Pîlemûriye yê Dêrsimî de rojanê peyênan de seydê pezkovîyan ke hesaban ra bin pawitişê Wezaretîya Karê Awe û Daristanan de yî, her ke şono zêde beno. Heywanê ke seba elewîyan bi hawayo pîroz yenî dîyayîş, hetê seydwanan ra bi hawayo hov yenî kiştiş.
Baroya Dêrsimî zî derheqê seydê pezkovîyanê newalê Munzur û Pîlemuriye de muracatê Wezaretê Karê Awe û Daristanan da.
Baroye muracatê xo de wina vato: “Newalê Munzurî û Pîlemuriyê ke çarçeweya Qanûnê Parkê Milî ya hûmara 2873 de ca gênî, nê cayan de bitaybetî kiştê rayîran de seydê pezkovîyan yeno kerdiş. Yeno zanayîş ke goreyê Qanûnê Seydwanîya Bejahî, seydwanîya pezkovîyan qedexe yo û yê ke pezkovîyan bikişî, raştê cezaya pereyî yenî.”
Ganî personelî bêrî girewtiş
Baro muracatê xo de Wezaretî ra zêdekerdişê personelan waşt û muracat de wina yeno vatiş: “Goreyê Qerarnameyê Hukmê Qanûnî û mevzuatê Wezaretê Karê Awe û Daristanan seydwanîya tewirê heywanan ke ver bi vînîbîyayîşî şono, pawitişê ci ra Wezaretî berpirsîyar o. Her çiqas ke wina yo zî bi hawayo îlegal seydê pezkovîyan hîna zî dewam keno, hetê pawitişê pezkovîyan de problemî estî. Seba ke hûmara personelan û kontrolê înan kêmî yo, vernîya seydê pezkovîyan nêeşkîyeno bêro girewtiş. Cok ra ganî hûmara personelan bêro zêdekerdiş û kontrolî bêrî kerdiş. Nê semedî ra muracat ameyo kerdiş.”
DÊRSIM