Akademîsyen Nurîye Gulmene û mamosta Semîh Ozakçayê ke bi Qerarnameyê Hukmê Qanûnî de kar ra erzîyayî, kewtbîy grevê vêşanî. Grevê înan kewt roja xo ya 69. Heto bîn ra grevê vêşanî yê Kemal Gunî ke seba girewtişê cenazeya lajê xo Murat Gunî dabî destpêkerdiş zî kewt roja xo ya 83.
Wendekaran piştî day
Edene de ciwanê ke Endamê Ciwanê Şorişgerî yê Devrîmcî Yolî yî, seba ke piştî bidî çalakîya grevê vêşanî, grevê vêşanî dayî destpêkerdiş. Nameyê ciwanan ser o Kubra Yeşîldage wina va: “Ma sey wendekarê Unîversîteya Çukurova û endamê Devrîmcî Yolî seba ke piştî bidî mamostayanê xo û Kemal Gunî kewenî grev. Ma nêşîna vera çalakîya înan de bêveng bimanî. Ma veng danî her kesî ke wa no het de hesas têbigêrî.” Qiseykerdiş ra dima ciwanan dest bi grev kerdî.
DÎHABER/EDENE