Îzeheto ke hetê ABDEM û Yewîya Hêzê Demokratîke ra ame weşênayîşî de yeno vatiş Davutoglu ke verpersîyarê qirkerdişê Pirsûs, Enqere yo û xo kemî Erdogan nêveyneno û fermanê qetlîyamê şarê kurdî dayo û wina verdewam kerdo: “Davutoglu û Erdogan bi tanq, TOMA û wesayîtê zirxin Sûr, Cizîr, Şirnex, Silopî, Gever, Nisêbîn, Hezex û şaristanê bînan bombe kenî, veşnenî û xira kenî. Bi qetilkerdişê bi seyan merdiman, veşnayîşê merdimê ke cêrzemînê Cizîrî, kaşkerdişê cenazeyê pey panzêran û rûtkerdişê bedenê cenîyan kerdî ra verpersîyar î.”
Wazenî rayna bikerî
Dergeyîya îzehetî de wina ameyo vatiş: “Davutogluyî Tirkîya de heqê merdiman betal kerdo, lejker û polîsan rameno ser her awayê çalakîyê demokratîke, akademîsyen, huqiqnas, rojnameger zî tede zaf kesan dano tepiştiş û kesê ke ci vera sere nêrono zî qetil keno. Wazeno destnêdayîşê wekîlan wedarno û no hetî de HDPe ra gefan weno. Navenda cayê ke elewîyî cuyenî de kampê DAIŞe virazeno û wazeno yewna ray qirkerdişê Gurgumî bivirazo.”
Peynîya îzehetî de ameyo vatiş ke Davutogluyo ke dişmenê şarê kurdî yo 19’ê nîsane de yeno Strasboûrgî û wina qedîyayo: “Sey ABDEM û Yewîya Hêzê Demokratîke ma veng danî kesê ke hetgirê azadî, aştî û demokrasî yî wa beşdarê çalakîyê şermizarkerdişî bibî.”
Ma xover danî
Dezgeyê sey Navenda Komelê Demokratîke ya Kurd a Strasboûrgî, ATÎK, DÎDF, FUAF, AABF, AKM-Kehl û AKM-Strasboûrgî zî awayo hembar îzehetêkî dayî û îzehetî de veng dayî ke wa her kes beşdarê çalakîya şermizarkerdişî bibî. Çalakî do Avenue de I’Europe ke banê Konseya Ewropa de ya de bêro viraştiş. Vernîya çalakî de bi bi şîyarê ‘Cizîrî ra heta Terolarî ma xover danî’ vengdayîşê beşdarbîyîşî ame kerdiş.”
STRASBOÛRG