OZGUR PAKSOY / MA / AMED
Taximê Amedsporî seba ke demê peyênan de xeylê maçanê xo qezenç keno, raştê hêrişanê faşîstan yeno. Çend rojî verê wexto ke taximê Sakaryasporî reyde kay kerdêne, maçî ra ver stadê Sakaryasporî de dîmenê ke propogandaya artêşa tirkî kerdêne, ameyî nîşan dayene û marş ame wendene.
Seba ke maç de Amedspor serkewt, maçî ra dima hetgirê Sakaryasporî hêrişê kaybaz û îdarekaranê Amedsporî kerdî. Hêzê ewleyîye hêrişan ver bêveng mendî. Serekê Amedsporî Nurullah Edemenî qisey kerd. Edemenî da zanayene wexto ke ê dî ke maçî ra ver dîmen û marşê ‘ez mirena Tirkîyaya mi’ ame cinitene, ê fam kerdî ke ewja de maç çin o.”
Edemenî va ‘ê dîmenî seba provokasyonî ameyî nawitene’ û wina dewam kerd: “Gelo kamî ê dîmenan ewja de ronayî û senî ameyî weşanayene? Senî ke maç dest pêkerd, hêrişê ma kerdî û dima ra zî dewam kerdî. Ez veng dana dozger û Federasyonê Futbolî yê Tirkîya (TFF) ke wa berpirsîyarê hêrişan bêrî ceza kerdene. Ma zî do derheqê înan de gerre bikerî. Amedspor bi serran o raştê hêrişan yeno û sebebê ci zî nameyê ‘Amed’ o. Ma hêrişan ra dima xeylê hetan ra telefonê piştîdayîşyewbînanî girewtî. Labelê hetê Sakaryasporî ra ti îzehet nêame dayene.”