Mabênê hukmatê Herêma Kurdistanî û Bexda de no demêk o ke problemê sîyasî estî û nê probleman ver hukmatê Bexda zî butçeya Herêma Kurdistanî nêda. Babete ser o rojnameger û aktîvîst Ferman Reşad û Parlamenterê Herêma Kurdistanî yo kehen Dr. Dana Seîd qisey kerdî.
Vatişêko ortax
Dr. Dana Seîdî va ‘mabênê kurdan de vatişêko ortax çin o’ û qiseykerdişê xo wina domna: “Têkilîya ke mabênê hukmatê Herêma Kurdistanî û yê Bexda de têkilîya mende nîya û tim problemî vejîyenî. Problemê butçe û rotişê petrolê Kurdistanî sebebê probleman o. Kurdî na babete ser o mîyanê xo de vatişêko ortax awan nêkerdo. Nika PDK verfekê Hukmatê Herêma Kurdistanî yo û înan butçeya 2017î red kerd. Cok ra zemîno ke têkilîyî baş bibî, çin o. Heta ke Bexda reyde dîyalog nêbî problemî çareser nêbenî.”
Beno problem
Ferman Reşadî zî va ‘nezelalîya ke babeta rotişê petrolî de esta, bena sebebê krîzî’ û qiseykerdişê xo wina qedêna: “Têkilîyê petrolî yê ke mabênê Hukmatê Herêma Kurdistanî û Tirkîya de, zirar danî kurdan. Netîceyê ci zî çaresernêbîyayîşê problemê mabênê Bexda û Hukmatê Herêma Kurdistanî yo. Tena yew çareserîye esta, a zî dîyalogê mabênê kurd û Bexda ya.”
HANA AZAD / ROJNEWS / HEWLÊR