Pakêta vurnayîşê qanûno bingeyî ke wazenê sîstemê ‘Serekwezîrî’ bi ca bîyarê cinîyê Dîlokijî zî nêrazîbîyayîşê xo mojnayî ra û vatî ke, “Semedo ke domanî nêmirê ma do vajê nê.”
Cinîyan ra Fehîme Karaca qisey kerd û va, “Ez sey cinîyê ke wazena peynîye pelçiqnayîş, rijnayîş, nîjadperestî û peynîye tertele bêro semedê aye zî ez vana ‘nê.’ Karaca aşkere kerd ke îqtîdar semedê cinîyan çi dîyar kerdo bellî yo û va, ‘Cinîya ke rastê tecawuzî ameya a cinî bi tecawuzkarî danê zewecnayîş.
Vûrnayiş do mi ra çi bigîro?’
Cinîyan ra Fatma Lebe zî va, ‘Semedo ke ez domananê xo rê ameyoxa başêr verda ez vana ‘nê.’ û wina dewam kerd: “Kesê ke wazenê sîstemê serekwezîrî bîyarê welat çi plan kenê? Vurnayîşê nê rejîmî do mi ra çi bigîro? Ma nê persan ra cewab nêvînenê. Çunke kesê ke vanê; ‘eya’ nêzanê çira vanê ‘eya.’ La ma zanê ke çira vanê ‘nê.’ Ma Kurdî bi serran çin ameyî hesibnayîş, ma ameyî kiştiş, dayîkanê aştîye bi serran cenazeyê domananê xo geyrayî. Serrê ke hema derbaz nêbîyo bi seyan cinî verê berayê morgî de bende DNA bî. Semedo ke ma reyna nê çîyan nêcuyê, ma ‘rejîmê yew mêrdekî ra vanê nê.”
‘Semedo ke dayîkî nêbermê ma vanê nê’
Edîbe Şahîne zî wina va: “Pirsusî, Anqara, Cîzre, Sûrî bîyarê vîrê xo. Bajarî ameyî rijnayîş, merdimî ganî ganî ameyî veşnayîş. Seba ameyoxê ke dayîkî nêbermê ma vanê nê. Şarê Tirkîyayî Kurdî, Tirkî, Erebî, Çerkezî, Lazî, heme bêkeyfê. Beno ke ma heme cayan bimrê. Kuçan de, suke de, keye de beno ke ma rastê teqayîşî bêrê û bimrê. Semedê aye gereke ma vajê ‘nê.’ Seba ke reyna ende dejî nêrê antiş ma do ‘nê’ de bêrê têhet.”
ŞÛJIN/DÎLOK