Şeqameke dîrokî li bin guhê AKP’ê
Endamê Komîteya Rêveber a PKK’ê Nedîm Seven destnîşan kir ku 24’ê Hezîranê wê bibe destpêka têkçûna faşîzma AKP-MHP’ê û bang li gelên Kurdistanê bi taybetî gelê Botanê kir ku wê rojê şeqama giran a dîrokî li bin guhê AKP-Erdoganî bixe.
Seven destnîşan kir ku pêvajoya qirrkirina gelê Kurd, 5’ê Nîsana 2015’an bi tecrîdkirina Rêberê Gelê Kurd Abdullah Ocalan dest pê kiriye û got, “Piştî tecrîdkirina Rêber Apo, hikûmeta faşîst a AKP-MHP’ê biryara komkujiya gelê Kurdistanê û pêşengên gelê Kurdistanê da.”
Nedîm Seven da xuyakirin ku gelê Kurdistanê di hilbijartinên 7’ê Hezîranê de bi têkoşîneke xurt, hîmên înkar, îmha û redê yên dewleta Tirk ser û binî hev kirin û destnîşan kir ku hemû nasname û baweriyên cuda yên li Tirkiyeyê tên înkarkirin, di 7’ê Hezîranê de derbeke mezin li sîstemê xistine.
Man û nemana rejîma AKP´ê
Seven bi bîr xist ku piştî vê yekê, rejîma AKP’ê bi darbeyeke siyasî hilbijartinên 1’ê Mijdarê pêk anîn û ji hingî ve dixwaze bi zext û zordariyê desthilatdariyeke faşîst li ser gelên Kurdistan û Tirkiyeyê bimeşîne.
Seven axaftina xwe wiha dewam kir: “Bi wê siyaseta komkujiyê re 24’ê Tîrmeha 2015’an re bi 400 balafiran êrişî Herêmên Parastinê yên Medyayê kir. Şerê 2015-2016’an ên bajarên Bakurê Kurdistanê, weke Cizîr, Sûr, Nisêbîn, Gever, Şirnex, Hezex û hemû deverên berxwedana xwerêveberiyê li dijî siyaseta qirrkirinê hate meşandin û bi saya wê berxwedanê ev siyaset gihîştiye asta têkçûnê.”
Nedîm Seven anî ziman ku qonaxa heyî qonaxa man û nemana rejîma AKP-MHP’ê ye.
Destpêka hilweşîna 24’ê Hezîranê
Seven ragihand ku hilbijartinên 24’ê Hezîranê wê bibin destpêka têkçûna desthilatdariya Tayyip Erdogan, hilweşandina faşîzma tifaqa cumhûr be.
Seven da xuyakirin ku hilbijartinên 24’ê Hezîranê hilbijartinên dîrokî ne û got, “Divê hemû welatparêz, hêzên sosyalîst, demokratîk bi rengekî yekdeng têbikoşin. Heger em ê xwedî li nirxên demokrasiyê derkevin, heger em ê jiyana bi hev re ya gelên Kurdistan û Tirkiyeyê pêk bînin, lazim e 24’ê Hezîranê li gelemperiya Kurdistanê herkes bi yek deng, yek reng ji bo Partiya Demokratîk a Gelan (HDP) biçin ser sindoqan. Bi taybetî ciwanên Kurdistanê û Tirkiyeyê wê bi dengê xwe, di dîroka şoreşa Kurdistanê de dawî li faşîzma Tayyip-Bahçeli bînin. Divê mirov bi vê berpirsyariyê rabin.”
Bang li Kurdan û Bohtiyan
Seven destnîşan kir ku bi taybetî gelê Botanê; Sêrt, Şirnex navçe û qezayên wê, bi taybetî jî Colemêrg, Şemzînan, Gever, Çelê, hemû gund û navçeyên wê divê deng û rengê xwe yê demokrasî, azadî û şeqama giran a dîrokî li bin guhê desthilatdariya Tayyîp Erdogan bidin, hebûna wî li Kurdistanê biqedînin, li Tirkiyeyê jî têk bibin.
Nedîm Seven bang li her kesî kir ku biçin ser sindoqan û xwest, ji deqeya destpêkê ya dengdanê heta kêliya dawî ya girtina sindoqan, çavdêr hişyar bin û bi rengekî girseyî nehêlin ku sindoq bên dizîn. Seven di dawiyê de got, “Serketin a demokrasiyê ye, ya azadîxwazan e, ya sosyalîzmê ye.” ANF/BEHDÎNAN