Rayvistişo terorîst DAIŞe serra 2014 de verê çimanê dinya de bi hetkarîya AKP û PDKe Mûsil dagir kerd û AKP û PDK, DAIŞ zey rayvistişê ke têk nêşona nîşan dayî la dijî çeteyê DAIŞe şerkerdişê hêzê YPG-YPJ-YPŞe û têkberdişê çeteyê DAIŞe ser projeya AKP û PDKe têk şî. Goreyê vengûvajê keyepela lekolin.orgî Abdulhamîto 2’in ra heta nika Mûsil cayêkî zaf bi muhîm o la seba DAIŞe zî Mûsil hema zî muhîmîya xo vînî nêkerdo. Hetkarîya çete û lojîstîkî Tirkîya ra seba DAIŞe bêmîyan domyena û no sewqîyat wextê şerê Kurdistanê Vakurî de zî domya. Hewlêr de wezîfedarê konsolosî ke nêwaşt nameyê xo bido, operasyonê Mûsil û têkilîya Tirkîya û PDKe ser qise kerd.


Operasyonê Mûsil û têkşîyayîşê DAIŞe

Wezîfedarê konsolosî wina vat: “DAIŞe bi rehetî Musil girewt, no zî nîşan dano ke Mûsil seba DAIŞ cayêko zaf bi muhîm nîyo labelê DAIŞ do Mûsilî ona rehet zî teslîm nêkera. DAIŞ, seba pawitişê Mûsilî hêzê xo sewqê Mûsilî kerd. Fikro ke DAIŞ nîno têkberdiş, no fikr bi xo têk şîyo. DAIŞe serra 2015 de verba YPGe de zaf ardê xo vînî kerd, no ser zî nika DAIŞ tena Iraq û Sûrîye de cayê ke destî de yî pawiyena. Mûsil seba DAIŞe cayêko muhîm bi la muhîmîya jeopolîtîkaya DAIŞe hîna muhîm a. Bi operasyonê Mûsilî vîra merdimî persê senî yew Mûsil? yeno, mudahîlê operasyonî no firsendî nêwazenî vînî bikerî. 


Xelayê Abdulhamîto diyin

Wezîfedarê konsolosî destnîşan kerd ke Abdulhamîto diyin ra heta nika mîyanê dewleta tirkî û hêzê mîyanêneteweyî de Mûsil problemêko gird o, eyro Tirkîya Mûsil verba PKKe de zey cayêko stratejîk vînena û wina domna: “Tirkîya wazena Mûsilî zey babeta bazarî verba hêzê mîyanêneteweyî de bişuxilna. Tirkîya wazena Iraq xebatê xo yê rayvistişî ser PDK, Mûsil de bikera û bertekan ser zî no planê xo Tirkîya paştê PDK, Heşdi û Watani ra aver bena. PDKe zî wazena hem ardê xo hera bikera hem zî bi têkilîya Tirkîya xetê Mûsil, Şengal û Rojawanî PKK, YPG û YPŞe ra hêriş bikera. Çarçiweya no zî Tirkîya operasyonê Mûsilî de PDKe ra dijî PKKe şerkerdişî rê çek dana û PDKe planê Tirkîya ra bi pêşmergeyê xo xizmet kena û xeyalê Abdulhamîtê diyine zî do bi pêşmergeyê PDKe pê bero. Tirkîya bertekê hukimatê Iraq, DYA û dewletê Ereban ser planê xo Mûsilî ser hîna bi nimiteyî aver bena. Seba ke Tirkîya çeteyê DAIŞe ra hetkarî daynî, no ser hêzê mîyanêneteweyî destûr nêdayî ke Tirkîya beşdarê operasyonê Mûsilî biba û Tirkîya zî wazena PDK û hêzê sunî ser zey Heşdi Watani ser beşdarê operasyonê Mûsilî biba.”


Mîyanê pêkewtişan de DAIŞe ra sewqê çekan 

Wezîfedarê konsolosî îzeh kerd ke demo ke operasyonê Mûsilî dest pê kerd pêşmerge eşkîyaynî çeperê Maxmurî ra aver şîro la no rayîrî nêşopna şî tena çeperê Başîka ra operasyonê tedayî şuxilna, çimkî armanc dûrê Artêşê Iraqî ra polîtîkayê averberdiş bî. Wezîfedarê konsolosî aşkera kerd ke pêşmerge demê pêkewtişan de zaf bi pasîf mend û lezî nêda, xora hedefê pêşmergeyî dekewtişê navenda Mûsilî nêbi, no ser zî tena dorûverê Mûsilî de mend.


Babeta petrolî de têkilîya DAIŞ û PDKe

Wezîfedarê konsolosî bal ant ser korîdorê Halebî ra sewqîyatê petrolî û no dergî da qiseyê xo: “Desan reyde nêqefelnayîşê korîdorê Halebî ser rayedarê PDKe têkoşîn dayî û no korîdorî ra sewqîyatê petrolî zî çapemenî de deşîfre bbî. Taybetê çapemenîya rûsî belgeyê ke aşkera kerdbî heme zey delîl bî. Nika no korîdor ser sewqîyatê petrolî nê, DAIŞe ra sewqîyatê çeteyan yeno kerdiş. Ma xetê Başîka ra eşnawit ke sewqê çeteyan yeno kerdiş û ma maqamê cayî ra no zanayîşî raşt kerd. Taybetê demo ke Cizîr, Sûr û Silopî de hêrişê çeteyê AKPe domyaynî, no xet ser çeteyê DAIŞe ra ameynî sewqkerdiş. Dewleta Tirkîya seba operasyonê Mûsilî de cagirewtişî rê û raştkerdişê îmajê xo ser adare ra nika sewqîyatê çeteyê DAIŞe daya vindarnayîş.” 



Eke Mûsil azad bibo do no demî çi bibo?


Wezîfedarê konsolosî ciresna ke eke Mûsil azad bibo û newe ra herra Iraqî bibo do dewleta Tirkîya hewna kampê Başîka ser biwaza polîtîkayê bimeşna. Wezîfedarê konsolosî vat ke Iraq de bîyayîşê DAIŞe û îdiaya serbixobîyîşê PDKe ser taybetê polîtîkayê Tirkîya balê hukimatê Iraqî anceno.

Wezîfedarê konsolosî wina vat: “Çend aşm verê DYA, Iraq û dewletê sûnî, Tirkîya ra seba hûmarê lejkerî ser bertek nîşan daybî. Plankerdişê operasyonê Mûsilî de PDK, Tirkîya û Artêşê Iraqî yewbînan ra cîya yo la demo ke Mûsil bêro girewtiş no demî nê hîrê hêzî cîranê yewbînan bibî. 

Têkilîya çutî de mudaxîlbîyayîşê heto hîrêyin ser bîyayîşê Tirkîya Iraqî, peynîya kampê Başîka, kampê Bamernê, Şeladize û Kanîmasî de zî bêro cipersayîş. Îdiayê serbixobîyîşê PDKe de rolê hukimatê Iraqî zaf muhîm o. Iraqo Vakur de, hukimatê Iraqî bêhêz bimano do no demî dewleta Tirkîya biwaza Iraq de hîna bandorker biba la hema zî îdiaya serbixobîyîşî dîyar nîya. Çimkî dewleta Tirkîya îqtîdarê Iraqî tahrîk kena û eke no gird bibo no demî PDK nêeşkena îdiaya xo ya serbixobîyîşî raşt bikera.”


 NAVENDA XEBERAN