Nurullah Edemeno ke newe bîyo Serekê Amedsporî û Endamê Heyetê Pêroyî yê Amedsporî, Hemserekê Şaredarîya Bajarê Girdî yê Amedî Gultan Kişanake û Firat Anli zîyaret kerdî. Nurullah Edemenî zîyaretî de qisey kerd û îzah kerd ke wayîrê taximêko baş ê û kenê ke maçê nê hewteyî de 3 puanan bigîrê. Edemenî wina va “ Ma xo ra bawerê ke emser bibê şampîyon. Aye ra ma qayîlê wa her kes desteg bido Amedspor. Stadyuma ke ma tede maç kay kenê hetê fîzîkî ra xirab a. Aye ra ma qayîlê wa Şaredarîya Bajarê Girdî desteg bido ma.”
Kişanake: Ez bawer kena ke şima do bibê Şampîyon
Dima ra Hemsereke Gultan Kişanake qisey kerd û va “Eke şima maçê ewlininî ra bi 3 puanan abigeyrê zaf weş beno û îdîaya şima ya şampîyonî bena qewetin. Ez bawer kena ke şima do emser bibê şampîyon. Ma her tim kişta Amedsporî de ca gênê. Ez maçanê şima de şima rê serkewtiş wazena”
Anli: Tay taximî bajaran ser o yo û tesîrê înan zaf o
Dima ra Hemserek Firat Anli yew qiseykerdiş kerd. Anliyî zî va “Amedspor wayîrê yew mîsyonî yo. Tay taximî bajaran ra ser ê. Tesîrê înan yew bajarî ra zêde yo. Goreyê mi Amedspor zî wina yo. Tena Amed ra ney her ca de Amedspor yeno naskerdiş. Teberê na cografya de tesîrê Amedsporî esto. Sezona verêne Amedspor zaf zehmetî ant la reyna mîsyonê xo ard ca. Semedo ke şima bibê serkewte çi destê ma ra bêro ma do bikerê. Amedspor yew hêvî yo û lazim o ma na hêvî berz bike.”
Serekê Kûlube formaya Amedsporî dîyarê hemserekan kerde
Zîyaretî ra pey Serekê Kûluba Amedsporî Nurullah Edemenî, formaya Amedsporî ya 21 numreyîne dîyarê Kişanake û Anli kerd. Heto bîn ra Anli û Kişanake semedê maçê Amedspor-Konya Anadolu yo ke siba (10 Êlul) saete 15.30 de do bêro kaykerdiş ameyî dawetkerdiş.
AMED