Emser Serrgêra Serewedaritişê Kobanê yê 6 û 8ê Teşrîna verêne yo. 6ê Teşrîna verêne de vatişê ‘Kobanê ha kewte, ha keweno’ra dima serewedaritiş dest pêkerd û heta 9ê teşrîna verêne dewam kerd. No vatiş tena sereyê xo seba vejîyayîşê şarî yê kuçeyan bes bî. No vatiş tena dalpeya peyêne yo, neke tena sebebê Serewedaritişê Kobanê nîyo. Xora heme çî verê cû dest pêkerdbî. Rojeva Tirkîya û dinya de rolê muhîmî yê nê serewedaritişî esto.
Seke yeno zanayîş 2014 de DAIŞî bi hawayo sîstematîk dest bi hêrişkerdişê Rojawanî kerdbî. 10ê êlula 2014î de DAIŞî dest bi hêrişê Kobanê kerd û şarê Kobanê hêrişî vera xo eştî sînorê Tirkîya. Çimkî çeteyan hêrişê dewan kerdênê û qetlîyaman viraştênê. Seba ke no kanton orteyê her di kantonanê bînan de bî û cîranê Til Ebyad û Cerablusî bî, raştê hêrişê çeteyan ame.
20ê êlule de bi hezaran merdimî ver bi sînorî herikîyayî, labelê dewlete sînor ser de tedbîrê hîrayî girewtî. Botayê sînorî de DAIŞî bi topan hêrişê Kobanê kerdêne, natayê sînorî de zî dewleta tirk bi gaz û awa şidênaye hêrişê şarî kerdêne. Rewşe her ke şîyêne xirab bîyêne. Aşma teşrîna verêne de DAIŞ kewt merkezê Kobanê. No zî bî sebebê serewedaritişî.
Game bi game serewedaritiş
Aşma teşrîna verêne de şer xeylê giran bîbî û çimê pêroyîya dinya Kobanê de bî. Amed û Stenbol de bi beşdarbîyayîşê bi desan rêxistine û dezgeyan çalakîyî ameyî viraştiş. Rayberê Şarê Kurd Abdullah Ocalanî o wext dîyar kerdbî ke ganî heta peynî xoverdayîş bibo. Însîyatîfê Şarê Amedî reaksîyon nîşan dabî û seba boykotî veng dabî. Şarî zî wayîr vejîya û nêşî mekteb û cuye vindete. 4ê Teşrîna verêne de Salih Muslîmî Tirkîya ra waşt ke wa korîdorêkî biakerî, labelê hetê Tirkîya ra cewab nêdîya nê waştişî. 5ê Teşrîna verêne de Arîn Mîrkane çalakîyêka fedaî viraşte û na çalakîye seyrê şerî bedilna.
7ê Teşrîna verêne: Îzehetê Erdoganî
7ê teşrîna verêne de Serekkomar Erdoganî vatbî ‘Kobanê ha kewt, ha keweno’ û nê vatişî ra dima Serewedaritişê 6 û 8ê Teşrîna verêne yan zî bi nameyêko bîn Serewedaritişê Kobanê dest pêkerd û nizdîyê 3 rojan dewam kerd û her cayê Tirkîya de reaksîyonî ameyî nîşandayîş. Rewşa ke Kobanê de vejîya orte, êdî nîşan dayêne ke problem estene û çinêbîyayîşê kurdan o. Vatişo ke destekê Tirkîya yê çeteyan bi hawayo aşkere dîyar kerdêne ra dima şar vejîya ziqaqan. Şarî vera na bêwijdanî de hêrs û reaksîyonê xo nîşan da.”
ANF/BRUKSEL