Her çiqas her hetê komelî ra waştişê koalîsyonî bibo zî Erdoganî seba îqtîdarê xo hem vernîya koalîsyonî girewt hem zî Kurdistan de dest bi şerî kerd.
Zaf sebebê şerê Erdoganî estê. Serkewtişê HDPe nînan ra yew o. A dîyîne sîyasetê Tirkîya yê Kurdistano Rojawan o. A hîrêyine zî sey Mubarekî, sey Kaddafîyî bi temam vîndîbîyayîş o. Erdogan weş zano ke eke o tenya îqtîdar mebo siba roj seba dizdîya xo, seba Roboskî, seba pîlkerdişê grûbanê selefîyan yê Sûrîyeye hesab dano.
No semed ra 7’ê Hezîrane ra pey Kurdistan de şerêko pîl da dest pê kerdiş. Demokrasî, reform, heqê merdiman ûsn. çîyêkê çend serrî yo vanê ma wayîr vejîyayî yew reyde eştê kişte û bi polîtîqa û metodê serranê 90’î dest bi şerrî kerd. AKP bi no şeklî hem wazena reyanê MHP yê nîjadperestan bigero, hem zî HDP terorîze bikero û Tirkîya de paştîya aye kêmî bikero. Nika weş vejîyayo raşte ke serekbîyayîşê Erdoganî hînî xeyal o labelê o wazeno ke tenya îqtîdar ey dest de bimano. Seba naye zî çimê xo sey her dîktatorî kor kerdî.
Heto bîn ra polîtîkayê Sûrîye yê AKP zî rewşa peyen de bi temamî îflas kerdo. Nînan heme polîtîkayê xo şîyayîşê Esadî û parçekerdişê Rojawanî ser o avan kerdbî. Nika Sûrîye ser o heqê qiseykerdişê Tirkîyaye zî nêmendo. Na deqa ra pey zî ê nêşenî vernîya wayîrê statubîyayîşê kurdanê Rojawanî zî bigerî û îhtîmal esto ke îqtîdarê nînan şêro ê do seba sucanê şerî zî berî muhakemekerdiş.
No semedî ra AKP û Erdoganî prosesê çarekerdişî girewt û eşt kişte û dest bi şerrî kerd. Nika wazenî ke reya pêroyî îqna bikerî ke şer înan ney PKK dest pê kerdo û meşruîyeto ke PKK bi sayîya Şengal, Kobanê û heme Rojawanî de qezenç kerdo vîndî bikerî. Labelê ma weş zanê şerrê temmuze de dest pê nêkerd. Qerarê HDPe yê bi partî beşdarê weçînayîşan bîyayîşî ra pey AKP qerarê şerî girewtbi xora. Aşma Nîsane ra nate xora Rayverê Şarê Kurd birêz Ocalanî reyde pêvînayîşî bêhuqiq qedexe kerdî. Dima provakasyonê Agirî, bombeya Edeneye û bombeya mîtînga Amedî ameyî.
Têgêrayîşê Azadî yê Kurdan reyna zî verba nê provakasyonan de pozîsyonê xo nêbedilna. Labelê 7’ê Hezîrane ra pey AKP weçînayîş ra tenya îqtîdar nêvejîyayî û hema hema rayê kurdan bi temam vîndî kerdî. Seke Erdoganî vatbi: “Proseso ke ma rê feydeyê xo çin o, ma qey dewam bikerî?” Na rey vat ke “Kurdê ke feydeyê înan ma rê çin o ma qey înan dir aştî bikere?” û bi bombaya Pîrsûsî dest bi şerî kerd.
Nika 1’ê Teşrîne de reyna weçînayîş esto û AKP na reye paştîya xo şana ya çeteyanê mafya, JÎTEMa serranê neweyan û JÎTEMa Rojhilato Mîyanênî; DAIŞ. Bi nê metodan wazenî kurdan, sosyalîstan û demokratan bîtersnî, biremnî. No semed ra zî roja yewşeme bi destê înan mîyanê aştîwazan de bombayek ameyî teqnayîş.
Labelê ma nêtersenî, ewro zî 1’ê Teşrîne ra pey zî mucadeleyê ma do dewam bikero heta azadîye!
M. XEYLANIJ