Şervanê heqîqetî: Rohat Aktaş - Yeni Özgür Politika

Rohat Aktaş bi sifatê mudirê Azadiya Welatî, prosese Xoverdayiê Cizîrî seba heqîqetî bişopno şî qezayî û uca de zî 2016î de ame qetilkerdiş. Şehadetê Rohat de 4 serî derbas bî, seba qetilkerdişê ey, o bi vîr anenê.

LÊL AMED / AMED

Rohat Aktaş, sey ciwanêko kurd û malbatê welatperwer Stenbol de maya xo ra bîyo. Serra 1999î de bi malbatê xo çarserrîya xo de agêrenê Rihayî. Rohat hîna domanîya xo de gelekî malbatî, welatê xo ra hes kerdinî. Tewro zaf kayê gogî ra hes kerdinî. Waştinî bi rehetî hereket biko. Domanêko bê ters bî, dewe ra hes kerdinî û waştinî dewe de cuye biko. Têkilîya ci ya bi embazê xo ra zaf bi weş bî.

Hîna emrê xo yê şenik de doz û têkoşînê Kurd û Kurdistanî ra nas keno. Domanîya ey de datê ey (Kemal Aktaş) no dem hepixane de yo. Bi malbatê xo şono pêvînayişê datê xo. Bi çimanê xo teda û zilmî ser komel û welatê xo Kurdistanî vîneno. Rewşa Kurd û Kurdistanî de xo nas keno û her tim fikrîyeno û keweno mîyanê cipersayişêkî.

Rohat, 11 serrîya xo de êdî Herekete nas keno, 12 serrîya xo de dest pê bi vilakerdişê rojnameyê Azadiya Welatî keno. Riha de zî mîyanê xebatanê ciwanan de ca gêno. Her tim keweno mîyanê hewldayişêkî. Peynîya serran mîyanê xebatanê Çapemenîya Azad de cayê xo gêno, 8ê tebaxa 2015’î de beno Mudirê Karê Nuşteyan ê Rojnameyê Azadiya Welatî ê ke hetê desthilatdarîye ameyo girewtiş. Beno şagirtê Apê Musa û dano ser şopa raştîye, beno vengê şar û şervanêko heqîqetî.

Demê mîyanê xebatê rojnameyî de bî, eynî demî de seba Stêrk TVyî zî bernameya ciwanan virazeno. Prosesê dijwar de bajar bi bajar gêreno û rojnamegerî keno. Bêşik Kurdistan de rojnamegerî nê asan o. Ganî ti sey şervanêko heqîqetî û têkoşerêko doza azadîye bi qewet û wayîrê qerarî bibî. Rohat demo xebityeno dormareya xo ra ewnîyeno û vano: “Qey şar wina bêveng o.” Çikî ke fikrîyeno waştinî her kes sey ci bibo. Waştinî ti kes vera zilm û zordarî bêveng nêmano. Her tim vera zilm û tedayî de mîyanê têkoşînî de bî û tewro peynî şî Cizîr. Cizîr de pêkewtiş estbî, xo ra 24ê temmuza 2015î de vera şarê Kurd, hetê Dewleta Tirk qirkerdişêko topyekin ameybî destpêkerdiş. Vera no qirkerdişî zî şarê Kurd qerarê xorayîrberdiş û xo pawiyayişê girewtbî û verê xo daynê.

Xoverdayişê xorayîrberdişî vera hêrişê çinkerdişî yê dijî şarê Kurd û hêzê azadîye bî, dijî teslîmîyet û xiyanetî verpersêko xopawiyayiş bî.

No xoverdayiş bi rengêko aşkera her kesî ra resna ke êdî sey verin ti hêz nêeşkeno çinkerdiş û çinhesibnayişî ser Kurd û Kurdistanî avzel biko. Yewine rayîrê xelisnayişî zî xoverdayiş o. Seba azadîye berdel çi bibo bila bibo wa bêro dayiş. Xoverdayişê Xorayîrberdişî yê Cizirî bi aşman dewam kerd û Dewleta Tirk peynî ke fam kerd nêeşkena netîce bi dest bika, tewro peynî 24ê kanûna 2015î de bi deshezaran lejker, bi seyan tanq û her tewirê çekanê giran û yê teknolojik hêriş berd berd ser bi seyan ciwananê xoverdekar û şarê Kurd.

Dewleta Tirk bi kerdişê hovaneyî de dest bi rijnayişê Cizîra Botan kerd, xoverdakarê Cizîrî dijî vengê teslîmîyetî mîyanê şert û mercê zaf giran de têkoşîn daynê û mesajê merdim her şertî de eşkenî rûmetê xo bipawî daynî her kesê. Taybetî xoverdakarê Cizîrî aşkera kerdî ke teslîmîyet do nêeşkîyo na herra ra bireso. Heta peynî rûmetê şarê Kurdî pawitê. No ca de muhîm o merdim qehramanê gird ê xoverdakarê Mehmet Tunç zî vîr bîyaro. Mehmet Tunç vatinî: “Ma ver xo da, bi ser berz bibê.” Belê ewro şarê Kurdî deyndarê no xoverdayişê Mihemedê Botî û embazê ci yê.

Teslîmîyet merdo

Belê Rohat xo ra beşdarê no xoverdayişî bibî, waştinî no hovîtî tarî de nêmano, bibo vengê xoverdayişî la hêzê Tirk seba kerdoxê înan ê hovaneyî nîrî aşkerakerdiş Rohat zî xo ra kerdbî hedef û mile xo yê çepî birîndar kerdbî. Hetê Rohatî, bi desan ciwanê Kurd cêrzemînan de esîr mendbî la belê goş nêdaynê vengê teslîmîyetî û bi xoverdayişê xo mesajê ‘Êdî teslîmîyet merdo’ daynê.

Hêzê dewleta Tirkî yê merdimî ra bêparî vera no vindertişê bi rûmet har û delu biynê, cêrzemînan de Rohat zî mîyan de 137 ciwanê Kurd bi awayêko ganî vêşnayê. Her wina netîceyê no xoverdayişî de nêzdî 300 kes şehîd bîyê.

Beyraqa xoverdayişî do berz bibo

Hovîtîya dewlete ke Cizîr kerd ke cenazeye xoverdakaran nîrî naskerdiş. Netîceyê testê DNAyî de malbatan cenazeye xo girewtinê. 25ê sibate de zî cenazeye şervanê heqîqetî Rohat Aktaş ame teşhîskerdiş û 26ê sibate de zî dewa ci ya Pirsûsî bi beşdarîya bi hezaran ame defînkerdiş. Belê 4in serrgera şehîdê xoverdayişê Cizîrî Rohat Aktaşî de yê la belê na beyraqa xoverdayişî ya ke ame berzkerdiş do her tim berz de bimano. Rewşa estî de xoverdayiş zaf rasteyan de yeno dayiş. Seba mîras û wesîyatê xoverdayişê xorayîrberdişê bêro kerdiş, eştişê gamê ber bi serkewtişî yê.

Vera tecrîdî zî hetta peynîya serra 2018 û 2019î de rêzdar wekîla HDPî Leyla Guven dest pê çalakîya greva vêşanî kerd, bi gama Leyla Guvene pêroyina Dinya û hepixaneyan de çalakîyê greva vêşanî dest pê kerdê û zaf ciwanî zî çalakîya xokiştişî kerdê, çalakîyan ser o dewlete reyde mutabakat virazya kêm zî bibo beranê Îmralîyî abîyê. Ma bawer kenî ke Tirkîya de tena çareserîya persigirikê Kurd nê, xetimyayişê sîyasetê Tirkîyaye zî bi akerdişê beranê Îmralîyî çareser bibê û ma na bawerîya xo zî her ca de anenî ziwan û têkoşînê xo domnenê.

Belê Rohat mîyanê starî asîmanê Kurdistanî yê ke rayirê têkoşînê azadîya ma roşn kenî de yo. Ewro zerrîya bi mîlyonan ciwan û şarê Kurd de yo û rayberê rayîrê ma yo. Ma bawerî demo ke beşdarê karwanê azadîye bîyo, bi hezaran şopdarê Rohatî yê. Ma hewna şopdarê Rohatî bibî ke ameyoxê ma roşn keno.

Tunç: Ma ver xo da, bi ser berz bibê