Hemleya Azadkerdişê Reqqa ke hetê Hêzê Sûrîyeya Demokratîke (HSD) ra dîyaybî destpêkerdiş, roja xo ya 100. de dewam kena. Şerwanê HSDyî çeteyanê DAIŞî merkezê Reqqa de teng kerdî û her ke şono merkez de pêrodayîşî zêde benî. Tewr peynî bi azadkerdişê El Sukne taxê ke ameyî rizgarkerdiş, hûmara înan bîye 16. Heta nika xeylê nuqtayê stratejîkî çeteyan ra ameyî girewtiş. 

Mîyanê HSDyî de cîya cîya şaran ra şerwanî estî û no het de HSD rêxistinêka kozmopolît a. Reyna mîyanê HSDyî de şerwanê ke wayîrê hîkayeyê cîya-cîyayan î, estî. Nînan ra yewe zî Denyar Amedo ke şerwanêkê eslê xo de armenî yo. Denyar Amedo ke qeydê nufûsê ci Kantonê Hasekê ya Vakurê Sûrîye ser de yo, keyeyê ci wexto ke Qanûnê Tehcîrî yê 1915î yeno vetiş, Amed ra surgunê Sûrîye bîyo.1915 de surgunê Sûrîye bîyo

Denyar Amedo ke keyeyê ci eslê xo de bajarê Amedî ra yo, çend serrî verê musayo ke eslê xo de armenî yo. Cok ra nameyê Amedî sey peyname girewto û bi destpêkerdişê Şorişê Rojawanî dest bi cigêrayîşê vîyarteyê xo kerdo. Wexto ke Amed seba ke kura ra yo cigêrayîş keno, museno ke wextê Qirkerdişê Armenîyan de Amed ra surgunê Sûrîye bîyo. Dima ra raştîya xo gêreno

Babete ser o Denyar Amedî qisey kerd. Amedî va ‘ez nasnameyê xo gêrena’ û wina dewam kerd: “Heta ke ez nasnameyê xo zelal bikera, ez do peynîya ci nêverda. Ez wazena bimusa ke keyeyê mi prosesêko senîn ra derbaz bîyo, çi cuyayo. No hertim vernîya mi de vindete yo. Ez ganî bimusa ke kam a, kura ra û senîn ameya.”

Amed wexto ke qala cayê ke hetê DAIŞî ra nêameyî rijnayîş keno, vano ‘beno ke kesê ke ê cayan viraştî, nizdîyê xo dîyî, nêrijnayî’ û wina domna: “Ez nê cayanê tarîxîyan nizdîyê xo vînena û seba ke ê nêrî rijnayîş, çi destê mi ra bêro ez do bikera. Cok ra seba ke Reqqaya Kehene bêra rizgarkerdiş, çi destê mi ra bêro, ez do bikera. Ma netîceyê pêrodayîşanê şîddetinan ra dima Reqqa û cayanê tarîxîyan destê DAIŞî ra rizgar kerdo.”

Amedî qiseykerdişê xo de qala hêrişkerdişê Hesekê yê DAIŞî kerd û wina va: “Wexto ke DAIŞ kewt Hesekê hêrişê heme hetan kerd. O wext suryanî, keldanî, armenî û asurîyê ke tîya de bî, heme mecbûr mendî ke biremî. YPG ame hetkarîya ma. Ma bi ameyîşê YPG bîyî hêz û dest bi pawitişê xo kerd. Ma do heta ke DAIŞî çinî bikerî, şer bikerî. Na berpirsîyarîya ma ya tarîxî ya.”

Amedî peynîya qiseykerdişê xo de va ‘Ma Sûrîye de verê cû qetlîyamê ke DAIŞî kerdî reyde têrî mendî’ û wina qedêna: “Ma zulm û qetlîyamî verê cû Tirkîya ra musayî. Cok ra ma kerdişanê DAIŞî zanî. DAIŞ heme çîyî çinî keno. Hewl da ke ma armenîyan zî çinê bikero. Verê cû ti kes vernîya nê zulmî de nêvejîya. Nika ma seba pawitişê şarê Reqqa ameyî bajarê Reqqa. Ma heme şarê cîya-cîyayî yê Sûrîye yenî têhet û vera DAIŞî de şer kenî. Mîyanê ma de her hetî ra kesî estî.” 


 ANF/REQA