Ey mordemîye! Ey mordemîye goş bide mi. Goş bide mi ez derdê xo to rê vajî. Mordemîya binê lingan. Mordemîya ke zeleqîyaya hard ra. Ez Êzidî ya. Ez cinîyade Êzidî ya. Verê ke Êzidî bî mordem a. Yewa şima ra wa. Cisnê mi cisnê şima yo. Ez çisnode bîn ra nîya. Sey şima wayîrê di lingan, di destan, di çiman a. Pirnikade mi esta. Di firnê aye estê ez kî uca ra nefes gêna. Fekêde mi esto ez kî uca ra wer wena. Zereyê fekê mi de ziwanêde mi esto, ez pey qisey kena. Beno ke şima nêzanê, ez bi kurmancî qisey kena.
Ey mordemîye goş bide mi! Ti gereke goş bidêrê mi. Ey mordemîya binê lingan. Ez kan a. Ez zaf kan a. To bi mi dest pêkerd. Mi ti bi senê birêniyan arda. Mi çiçik da to. To mi de gix kerd. To mi de bul kerd. Ti mi de bîya genc. Bîya wayîrê zurîyetî.
Ey mordemîya binê lingan goş bide mi. Goş bide mi no derdo ke mi weno, no kulo ke zereyê mi de vîrazîyo yê to yo. To zereyê mi kerd halênê derd û kulan. Derd û kulî çikê? Ti mi her roje, her seate, her deqaye, her vîste kîşena. Kîşena kîşena kena weş. Kîşena kîşena kena weş. To ez gureta îşkence, renc û ezabode giran. To ez êşta gola ezebî. Ez mîyanê gola ezebî de gevezîna. Ti kotî ya? Ti binê linga der a nê? Ti se biresê mi?
Ez cinîyade Êzidî ya. Ez şahida terteleyê hewtay û hîrêyîn a. Ti zanena ez nika tekûtena ya. Binê banêk de bi tena sereyê xo ya. Daîşo ke şima vet ne yew, ne dide, ne hîrê, ne çar çarês canê mi, mi ra visnayî û berdî. Çarê aşma heşta ra mi ê nêdîyê. Ê destê Daîşî der ê. Şeş tornê min ê qickekî. Şeş tornê min ê sey aşma çarese.
Ez se bikerî? Mi ra vaje mordemîye. Mordemîya hezar serran. Ez sebikerî ha sebikerî? Ne mirena ne cuyena. Araf de aliqîyaye menda. Venganîye de dardekerdî menda.
Mi bawerîya xo bi to arde. Mi va qey ti hîna esta. Mi va qey ti hîna ser lingan a. Mi kotî ra bizanitênê ke ti ginaya binê linga ra. Ti zeleqîya hard ra. Mi kotî ra bizanitênê. Mi ti xo ra zanita. Mi bawerîya xo dayê înan. Ma û ê kewrayê yewbînî bîme. Mi kotî ra bizanitênê ey hende puşt ê. Mi kotî ra bizanitênê ê hende qapik ê. Hende teres ê. Ê ma biancê dafike. Ma bidê destê Daîş. Mi kotî ra bizanitênê înan rew ra ti êşta binê linganê xo payê to kenê ey mordemîye.
Ey mordemîye eke ti wazena binê lingan ra vecîyê, eke ti wazena reyna bibê mordem, vengê mi biheşne. Ti mi de gina binê lingan ro, ti reyna şîkîna mi de binê lingan ra vecîyê. Sereyê to, terteleyê ke to ardî mi ser de gina war o reyna şîkîno mi de bibo berz. Eke ti wazena nê şermî ra bixelesîyê ra vengê mi biheşne. Ez to ra çîyê nêwazena. Ez to ra tenê adalet wazena. Ez to ra vana wijdanê xo yê korî hêşar bike. Qeşaya ey bivileşno ro. Nêbo pênîya mi pênîya to ya…