Qetlîyama 2ê Temmûz yê Sêwas vizêr serragêra ci de, ver Otelê Madimak de amê lanetkerdiş. Bi hezaran kesê ke bi sloganê “Heq, huqûq, edalet“, “Yê ke Sêwas veşnay, yê ke AKP ronay ê“ taxa Alî Baba ra heta ver Madimakî ke 33 kesî mîyan de amey veşnayen, meşyay.
Merasîmo ke ver Otelê Madimakî de bi vîrardişê 33 kesan destpa kerd de zî zihnîyetê faşîst yê dewlet rê nêrazîbîyayîş damûsnîya. Herzewbîn emserr zî waştişê “Açarnayîşê Muzeyê Şermî yê Otelê Madimakî“ ame ziwan. Serokê ABF Muhîttîn Yildizî aşkere kerd ke 24 serrîyo ke dûmanê sîya yê Sêwasî nêtemirîya.
Elewî do vera faşîzmî de bivejyî meydanan
Heto bîn ra Komeleya Elewîyê Demokratîkî (DAD) 18ê hezîrane de Stenbol de kongreya xo viraşte. Îmam Balsever ke newe ra bî Serekê DADî yê Şûbeya Stenbolî, mesajo ke kongre ra vejîya û derheqê têkoşînê xo de qisey kerd.
Balseverî dîyar kerd ke “Şarê elewî rê xizmet kerdiş, heq û heqîqatî rê xizmetkerdiş o.“ û va, wezîfeyo ke keweno milê ma ser de bihêzkerdişê têkoşînî yo. Ma do bibî layîqê elewîyan.
Elewîyî do xover bidî
Balseverî bale ant têkoşîno ke DAD no proses de nîşan bido ser û wina va: “Ma do nika ra pey rasteyan de bibî û no proses ma ra hîna zafêr pratîk wazeno. Ma do vera faşîzm û OHALo ke hetê AKPyî ra ame îlankerdiş de têkoşînê xo berz bikerî. Ma tarîx ra nata tim zulm dî û qetlîyaman ra derbaz bîyî, nika zî ma zalimêk reyde rî bi rî yî. Cok ra hedefê ma yo sifteyîn averberdişê xopawitişê xo yo cewherî yo.”
Balseverî qala Operasyonê xelesnayîşê Reqqa zî kerd û va:“Ma nê operasyonî nizdî ra taqîp kenî. Erdê Sûrîye seba elewîyan zaf muhîm î. Nê cayan de Hz. Alî û Hz. Huseyîn ameyî qetilkerdiş. Serkewtişê ke hetê YPG/YPJyî ra ameyî qezençkerdiş, hetê elewîyan ra yenî teqdîrkerdiş.”
SÊWAS/STENBOL