ŞEHRÎBAN ASLAN / JINNEWS/AMED
Derheqê tecrîdo girankerde ke Rayberê Şarê Kurd Abdullah Ocalanî ser o yeno meşnayîş de Kurdistan, Tirkîya û Ewropa de çalakîyî dewam kenî.
Babete ser o Endama MYKyî ya DBPyî Seher Tumere qisey kerde û qiseykerdişê xo de bale ante ser muhîmîya pêvînayîşan ser û va ‘eke bi hawayo lezabez pêvînayîş nêbo, do kaoso ke esto hîna zaf kûr bibo’.
Tumere va ‘Abdullah Ocalan serra 99î ra nata binê tecrîdêko giran de yo’ û wina dewam kerde: “Tecrîdo ke donemê peyênan de yeno bicaardiş, sey verên nîyo. Serra 2012î de zî tecrîdêko girankerde estbî. O wext grevê vêşanîye dest pêkerdbî. Netîceyê grevê vêşanîye de pêvînayîşî dest pêkerdbî. Dima ra serra 2013î de Birêz Ocalanî Newroze de mesajêk erşawitbî û prosesê aştîye dabî destpêkerdiş. Bi ê mesajê xo hêvî daybî şaranê Rojhelato Mîyanênî. Şer herinda xo verdaybî aştîye rê. Cenaze nêşîyênê ti cayan. Badê ke tecrîd dest pêkerd prosesêko giran kewt dewre.”
Ma vanî kilîtê aştîye yo
Tumere bale ante ser çalakîyê ke benî ser û wina dewam kerde: “Demanê peyênan de grevê vêşanîye û tayê çalakîyê bînî benî. Eke pêvînayîş nêbo, do şar çalakîyanê girdan bikero. Ma vanî ke Ocalan kilîtê aştîye yo. Kamcîn wext ci reyde pêvînayîşî bibî, o wext perspektîfan dano dewlete û vernîya dewlete akeno. Eke pêvînayîş bibo, do şarî qezenç bikerî. Şero ke Rojhelato Mîyanên de yeno meşnayîş de her îqtîdar wazeno xo payan ser de bigîro, cok ra tecrîdî giran kenî.”
Kurdî bi hawayo nizamin bedilîyenî
Tumere peynîya qiseykerdişê xo de wina va: “Rojawan de kurdî êdî bi sîstemêko newe bedilîyayîşan cuyenî û no sîstem zî hêvî dano kurdan. Sîstemo Kapîtalîst wazeno nêyî orte ra wedarno. Nika têkoşînê serran esto. Ganî dinya, Rojhelato Mîyanên û Tirkîya Ocalanî reyde pêvînayîşan bivirazî, sewbîna weçîniteyê înan çin o. Neke no proses do bibo sebebê şeranê gird û giranan.”