Rojawanê Kurdîstanî de vera hêrişanê çeteyan de xoverdayîşêko tarîxî amebi nîşandayene û saya bedelanê giranan de ewja de qala şorişêk yeno kerdene. Ewro xeylê qeza û bajaran de herinda ê xoverdayîşî estî. Nê cayan ra yew zî Wareyê Şehîd Ebû Şîyarî yo.
Taxa Şêxmeqsûdî ya Helebî de wareyê Şehîd Ebû Şîyarî ke 7 şerwanî û 5 sîvîlî şehîd bibi bîyo cayê vîrê komelkî û nînî vîrakerdene. No ware rojhelatê Taxa Seken Şebabî de yo û hetê şarî ra yeno zîyaretkerdene.
29ê Gulana 2016î de 5 şerwanê YPG û YPJyî, 2 endamê asayîşî û 5 taxijî bînayêk de bica benî û vera hêrişanê çeteyan de bi rojan şer kenî. Çeteyî ewnîyenî ke nêşênî înan, tunelan kinenî û dormeyê bîna de bombeyan bica kenî. Netîceyê teqayîşê bombeyan de 12 kesî zî şehîd benî. Cenazeyê înan Şehîdgehê Şehîd Refîqî de yenî definkerdene.
No ware bîyo cayêko pîroz
Cayê ke nê şerwan û sîvîlan xo feda kerdo, hetê şarî ra yeno zîyaretkerdene. Endamê HPCyî Hisên Silêman wareyê Şehîd Ebû Şîyarî paweno û ware de daranê meywe û gulan roneno. Silêman dîyar keno ke o keyeyê xo ra zafêr ewja de maneno û wina domneno: “No ware seba heme taxijan bîyo cayêko pîroz. Ma qet nêşênî deynê şehîdan bidî. Ez do heta peynîya emrê xo nê wareyî bipawa.”
MIHEMED EBDO / ANHA / HELEB