Çend rojî verê grûbêka faşîste Golbaşiya Anqara de hêrişê cenazeya Dayîka Aysel Tugluke Hatun Tugluke kerdbî û destûr nêdaybî ke cenaze goristan de bêro definkerdiş. Nêyî ver cenaze Dêrsim de ameybî definkerdiş.
Tesîrê hêrişo ke vera cenazeya Dayîka Hatun Tugluke de bî dewam keno û nawitişê reaksîyonan hîna zî domîyeno.
Babete ser o Vedat Atmaca ke verê cû otobusa HDPyî de raştê hêrişî amebî û taxijî qisey kerdî û melumatanê muhîman pare kerdî.Xora ti kes nêamebî tepiştiş
Atmacayî qala hêrişo ke o verê cû raştê ci amebî kerd û wina va: “Ma o wext dewe de otobuse reyde çend turî eştî û ma dî ke grûbêka 30-40 kesan ra pê ameyêne, rayîrê ma girewte. Dima otobusa ma raştê hêrişêko sîlehin ameye. Ewja de bi hawayo tesaduf çîyêk nêame sereyê ma. Xora hedîse ra dima ti kes nêame tepiştiş û derheqê hedîseyî de tehqîqat nêabî. Kesê ke hêrişê cenazeya Dayîka Hatune kerdî zî, eynî kesî bî.” Eynî kesî hêrişî organîze kerdî
Çîyo ke kesê ke taxa Încekî ya Golbaşî de ronîşenî vanî, vatişê Atmacayî raşt vejenî. Goreyê vatişê taxijan, demêko derg o ke taxe de grûbêka ke xo sey şerîatwaştox şinase kena, esta û na grûbe estena xo bi zext û tedayan domnena. Reyna goreyê taxijan na grûbe verê cû zî hêrişê HDPyî kerdbî. Taxijan dîyar kerd ke aye şewe grûba ke hêriş kerdbî, mîyanê grûbe de bi nameyê Harunî de kesêkî estbîyo û no zî Harun Ç.yo ke esnafî keno yo. Goreyê melumatan no kes verê cû hêrişo sîlehin zî organîze kerdo. Medya ser de pare kerdî
Reyna yeno vatiş ke muxtarê taxe ke birayê ci dozger o, o zî na grûbe paweno. Ame musayîş ke na grûbe medyaya komelkî ser ro nê melumatan pare kerde û va ‘ma terorîstî nêda definkerdiş’ labelê tepiştişan ra dima parekerdişî ameyî pakkerdiş.
MA/ANQARA