Verê cû seba ke rojnamegeranê swêdijan rêxistine kerdo û berdo Tirkîya, hukmatê AKPyî bi dayîşê qerto zerd xelate dabî ajanê MÎTî Metîn Altinişikî. Altinişiko ke sey muxabîrê ÎHA xebetîyayêne, seba ke rojnamegerê Swêdî beşdarê aktîvîteyê ke seba 15ê Temmuze yenî kerdiş bibî, hewldayîşêko gird da, labelê nêşîna rojnamegeran bîşêro Tirkîya. No het de tena 3 rojnamegeran şîyayîşê Tirkîya qebul kerdî.
Rojnamegerê Swêdijî tena dawetê AKPyî red nêkerdî, bi wesîleya serrgêra teşebusê derbe AKPyî rê mektubêk erşawitî. Îmzeya 33 derhêneranê sazî û dezgehan binê mektube de esta û mektube bi sernuşteyê ‘Erdogan rojnamegeran serbest verade’ ameya nuştiş. Mektube heme medyaya Swêdî ca girewte.Rojnamegerî mektube de etirîyayîşê xo yê derheqê azadîya çapemenîye ya Tirkîya ardî ziwan û wina vatîy: “Serrêk verê vera Tirkîya de teşebusêkê derbe ame viraştiş, labelê to vera kesê ke fikrê to de nîyî de hêriş da destpêkerdiş. To bi hezaran kesan sey xayîn, ajan û derbekar şinase kerd. Se ra 95ê medya bin denetîmê rejîmî de yo û pratîk de azadîya çapemenîye çin a.”Îmzeyan mîyan de derhênerê sazî û dezgehê ke tîrajê înan bi mîlyonan yeno zanayîş zî estî.
ANF/STOCKHOLM