Pîyê hepsî Rahşan Aydina ke 121 rojî yo ke grevê vêşanî de ya, Osman Aydinî çalakîyan ser o va ‘ez bi çar destan wayîrê çalakîya kênaya xo vejîyena’ û wina dewam kerd: “Neke xoverdayîş bi bêvengîye sernêkeweno. Eke ma bêveng bimanî, ma sernêkewenî.”
Vera şertê giranî yê tecrîdî de nizdîyê 6 aşmî yo ke sere de grevê vêşanîye û tewir bi tewir çalakîyî yenî viraştene û hewl dîyeno ke tecrîd bêro wedarnayene.
Çalakîya ke Hemsereka KCD û Parlamentera HDPyî Leyla Guvene daybî destpêkerdene roja 169. de, çalakîya hepsîyan roja 131, çalakîya Nasir Yagizî Başûr de roja 166, çalakîya 14 kesan ya Strasbourgî û Îmam Şîşî roja 130, Mexmûr de çalakîya Fadîle Toke roja 96, Kanada de çalakîya Yusuf Îbayî roja 104. de bêmabên dewam kena
Reyna çalakîyê ke Parlamentera HDPyî Dersîm Dage 3ê Adare de, Tayyîp Temel û Murat Sarisaç zî 8ê Adare de dabî destpêkerdene, dewam kenî. Hepsîyê ke kewtî grevê vêşanîye, înan ra yew zî Mehmet Kaziciyo ke Zîndanê Osmanîye de maneno yo. Kazici 1ê Adare ra nata grev de yo. Babete ser o cinîya Kaziciyî Tulay Kazici qisey kerde.
Waştişê ci waştişê min o zî
Kazici va ‘ma weşîye û cuya hepsîyan ver etirîyenî’ û wina dewam kerde: “Labelê waştişê înan waştişê ma yo. Waştişê înan, yê min o zî. Tena rayîrêk esto ke ma nêverdî ê bimirî; o zî bîyayîşê vengê înan o. Nika ke grevê vêşanîye ameyî merhaleyêko winasî, ganî ti kes dewlete ra çîyêk nêpawo. Her kes wazeno ke wa dewlete gaman bierza. Ez zî vana ‘gelo şima çîyêk kerd ke dewlete gaman bierzo?’ Şima paweyê çi yî? Xora dewlete wazena ke wa heme kurdî bimirî. Şima eşkenî gaman bi dewlete bidî eştene. Gere ma hîna zaf wayîrê waştişanê înan bivejyî û destek bidî înan ke ma nê waştişî bikerî rojeva dewlete. Tena kurdî nê, gere dostê kurdan zî wayîrê çalakîyan bivejyî.”
Vîtamîn û awe nêdîyenî
Pîyê Rahşan Aydina ke 2015 de tewqîf bîya û 121 rojî yo ke grevê vêşanîye de ya Osman Aydinî qisey kerd. Rahşane badê ke cezaya ci ameye tesdîqkerdene, 8ê Nîsane de erzîyaya hucreyo yew kesî. Pî Aydinî va ‘kênaya mi de problemê vînayîşî dest pêkerdo û tena bi sereyê xo nêşêna şêro lawabo zî’ û wina domna: “Vîtamînî nêdîyenî kênaya mi û lazimîya awe zî nîna temînkerdene.”
‘Ez bi çar destan wayîrê çalakîya aye vejîyena’
Aydinî da zanayene ke Rahşane ci ra vato ‘ez nêşêna hilm bigîra û wazena ke şêra mîyanê embazanê xo’ û wina va: “Ganî hukmat û Wezîrîya Edaletî demêko raver gaman bierzî. Eke çîyêk bi domananê ma bibo, berpirsîyar hukmat o. Wexto ke ez şîya pêvînayîşê kênaya xo, kênaya mi hetê fîzîkî de baş nêbî, labelê moralê aye baş bi. Mi zî fam kerd ke ganî ez bi çar destan wayîrê têkoşînê kênaya xo bivejîya. Neke no xoverdayîş bi bêvengîye sernêkeweno. Eke ma bêveng bimanî, ma sernêkewenî. Ez gere muracatê her cayî bikera û vengê xo berz bikera. Hukmat rolê 3 meymûnan kay keno. Nika qet çapemenîye qala grevan nêkena. Tena hetkarîya AKPyî kena. Labelê hepsîyî qerardar î ke heta ke tecrîd wedarîyo, têkoşînê xo bidomnî.”
AMED