Roje çin a ke zîndanan ra xebera zext, teda û neheqîye nêra. Xebatkara Radyo Sesî Fatma Olmeza ke 12ê kanûna 2016 de çarçeweya operasyonê vera HDPyî de ameybî tewqîfbîyayîş û 6 aşmî Zîndanê Tarsûsî yê Tîpa Cyî de mendbîye, çîyê ke zîndan de dîya ser o qisey kerde. Olmeze tewqîfbîyayîşê xo sey ‘çîyê ke teberê merdimîye de’ nîşan daye û wina domnaye: “Mîkrofon û haletê bînî ke mi seba weşanî xebetnayêne, sey ke mi çalakî û meşîyayîşî organîze kerdo, nîşan dayî. No qerarêko sîyasî yo û nêyî ra kesê ke muxalîf bîy, hemînan zî para xo girewta. Îqtîdar seba ke terseno hende tewqîfkerdişan keno.”
Ma do nîşanê şima bidî
Olmeze bale ante kerdişê ke zîndan de bîyî ser û wina va: “Wexto ke ma berdêne pêvînayîş, revîr yan zî telefon, gardîyanan waştênê ke ma bisehnî. Bin nameyê sehnayîşî de tacîzê ma kerdênê. Wexto ke ma vera kerdişanê înan de vejîyayênê, ma tehdît kerdênê. Gardîyanan ma ra vatêne ‘şima hema tacîz nêdîyo, eke ma şima bîşêrî kampusî, o wext şima do tacîzî bivînî. Ma do kampus de heme çî bi şima bikerî. Ma cayê 32 kesan de 55 kesî mendênê, mektûbê ma çimanê ma ver de ameyêne tirakerdiş. Reyna ma ra waştêne ke ma pêvînayîşan de bêxera keyeyê xo silam nêdî ti kesan. Eke ma silam bidayêne, aşmêk cezaya hucre dîyayêne ma. Gardîyanan ma ra vatêne ma teknîkanê pêrodayîşî musenî, eke ma şêrî kampus, şima ma rê lazim î. Ez do têkoşînê xo bidomna.”
DÎHABER/MÊRSÎN