Nîmeyê şewa Poncşeme quwetanê rejîma faşîst yê  Tirkîye, bi fermanê Erdoganî Hemserokanê HDP Demîrtaş û Yuksekdag ra pîya 12 parlementeranê HDP rehîn girotî. Tayê ci tepêşîyay, tayê ci zî bi şertê edlî serbest veradîyay. Sebebê na derbeya sîyasî aşkere yo. Rîwalo ke vernîya dîktatorî û konseptê herb de tenya HDP vindîya derbeyekê winasî virazîya. Wazenê bi bêvengkerdişê HDP û weçîntoxanê ci rejîmê dîktatorî bidê ramiten.

Girotişê parlementeran bi şiklê heydutî, korsanî û komployî virazîya. No yew binçimgirewtiş û tepiştiş nîyo, no rehîngirotiş û derbeyê qirkerdişî yo.  Na derbeya dîktatoryal sifte dûştê çapemenîya azad destpa kerd. Pêro qenalê televîzyon û radyo, rojname û kovarê ke goreyê fermanê Erdoganî hereket nêkenê amey girotiş. Derbeya AKP ya verra çapemenî zerre û teberê welatî de zey sînyalê  hêrîş û qetlîamanê newî amê hesibnayiş. No yew texmîn û îdiayeke veng/tol nêbi. 

HDP weçîntayişanê pêroyî yê 7ê Hezîran 2015î de more eşt bin serkewtişeke tarîxî û girdî. HDP bendawê weçîntayişî yê se ra %10 ravêrna, se ra %13,1 (6 mîlyonî) rey girotî û 80 wekîlî vet. 6 mîlyon weçîntoxan ra pîya pêro welatperwerê Kurd û şarê azadîwaşt çormeyê HDP de bî xelek û wayrê ci vejyay. Bi na serkewtişî HDP planê sîstemê Serokîn yê Erdogan’î veng vet. Bi netîceyanê weçîntayişan projeyê AKP welişya, bi wel û şi. 

AKP ya ke rîwalê na serkewtişî bî şoq û gonîya ci vindîya desinde kewt hereket û bi weçîntayişanê 1ê Mijdarî verra îradeyê weçîntoxan derbe viraşt. Erdoganî Tirkîye bin sersîya zilmê dewlet û tifingan de kirêşna ser sondiqî û bi kay û komployan netîceyê weçîntayişan goreyê xo eyar kerd. 

A roj ra na het teba nêmend ke rejîma faşîst ard HDP û weçîntoxanê ci ser. La reyna zî nêşa îradeyê ci bişikîno. Cok ra zey gama peynî yê derbe şewa verî parlementeran remna. No çîyekê ecêb nîyo. Na dewleta romî ra her çî yeno pawiten û êşkena pêro xiravînî bikero.  

Ma na dewleta faşîst 29ê Hezîran 1925î de qirkerdişê Şêx Seîd û embazanê ci ra silasnenê.15ê Mijdar 1937 de Elezîz de înfazkerdişê Sey Riza ra silasnenê. Terteleyê 1937-38 yê Dersim de ke bi hezaran kurdî ganî bi ganî veşnay, qirkerdî ra silasnenê. 1994î de bi zorî rehîngirotişê parlementeranê DEPî ra silasnenê. 28ê Kanûne 2011î de qirkerdişê 34 Roboskîyijan ra silasnenê. Tewr peynî de Cizîr de ganî bi ganî veşnayişê Mehmet Tûnçan ra silasnenê. 

La dinya, Kurdan zî rexmê pêrokîn zilmê faşîzmî serwedarnayiş û xoverdayişê ci ra silasneno û zano ke Kurdî ti wext çokan nêdanê ro, teslîm nêbenê. Cok ra na estanik tîya de nêqedîyena. Çike HDP tenya nîya. Pey HDP de îradeyê mîlyonan esto û dê nayî qebûl nêkerê. Hona şarî vatişê xo yê peynî nêvato. Zey ke Demîrtaşî û parlementeranê bîn yê HDP va, “Şima nêşkenê ma mehkema bikerê, encex şar êşkeno mehkema bikero.” Emrê zilmî û faşîzmî derg nîyo, tenya ke wa xoverdayiş kêm nêbo.