Hikûmeta AKP ke weçîntayisanê Heremî yê 30ê Adar 2014î de xêlê reyî û şaredarî kerd vinî, a roj ra tepya DBP kerd hedef. AKP ya ke sandiqan de nêşa şaredarîyanê sûkanê Kurdistan bigîro, nika bi şiklekê bêhiqûqî, bi zorê polîs û dewlete xesp kena. Tewr peynî de vizêr hemşaredarê Dersim, Wan û Sêrt zî tepêşîyay, hemşaredarê Mêrdîn wezîfe ra ame dûrvistiş û hurendîya înan de qeyûm tayîn bî.
DBP bi sîstema hemserokîn û bi slogana “Bi îdareyê xoser hetê kamîyê azad” kewt weçîntayisanê Heremî yê 30ê Adar 2014î. Netîceyê weçîntayişan de DBP îmze eşt serkewtişeke gird û 3 Şaredarîyê Sûka Pîl ra pîya 102 şaredarî girot. Tayî sûkan de zî DBP reyê xo kerdî vêşî û rekor şikitî. Sûkanê zey Sêrt, Dersim, Wan, Şirnex, Colemerg, Îdir de DBP reyê xo kerdî vêşî û Mêrdîn de zî şaredarî destê AKP ra girot.
AKP ya ke na serkewtiş hezm nêkerd wextekê derg o şaredarîyanê DBP kerdo hedef. Nika zî bi tayînkerdişê qeyûman şaredarîyan xesp kena. Nika 3 Şaredarîyê Sûkê Pîlî (Amed, Wan û Mêrdîn) û 5 sûkan de 34 qeyûmî tayîn bî, 52 şaredarî wezîfe ra girotîyay û39 hemşaredarî tepêşîyay.
Mêrdîn û Sêrt rê qeyûm
Tewr peyî vizêr hemşaredarê Dersim, Mêrdîn, Wan û Sêrt zî tepêşîyay û wezîfe ra amey dûrvistiş, hurendîya ci de qeyûmî tayîn bî.
Polîsan eştî Şaredarîyê Sûkê Pîl yê Mêrdîn ser û Ahmet Turkî wezîfe ra girot. Hurendîya Turkî de walîyê sûk Mûstafa Yaman zey qeyûm ame tayîn kerdiş. Tayînî ra dima polîsan seatanê sodir de şaredarî girot bin ablûqa û geyrayiş viraşt.
Sêrt de zî roja verî seatanê sodir de polîsan eştî keyeyê Hemşaredarê sûk Tûncel Bakirhanî ser û Bakirhanî girotî bin çiman. Bakirhan ke vejya vernîya mahkeme ame tepiştiş. Hurendîya Bakirhanî de yardimkarê walîyê sûk Ceyhûn Dilşad Taşkin zey qeyûm tayîn bi.
Wan zî xesp kerdî
Jû şaredarîya bîn ke amê xespkerdiş Şaredarîyê Sûkê Pîl yê Wan bî. Hemşaredar Bekîr Kaya ke ame tepiştiş hurendîya ci de walîye sûk Îbrahîm Taşyapan zey qeyûm ame tayînkerdiş. Tenya Hemşaredarî nê, sûk de herzewbîn bi desan kesî girotîyay bin çiman. Şewa verî polîanê AKP eştî keyeyan ser û qezayanê sûk de 41 kesî girotî bin çiman.
Verra xespkerdişî şarî xover da. Wan de gurekarê şaredarî ke ver bana DBP de are bî hêrişan rê nêrazîbîyen damûsnay. La polîsan bi cop û bombeyanê gaz mudaxaleyê şêligî kerd. Mêrdîn de zî xespê AKP protesto bi.
AKP nêşkena şarê ma îdare bikero
Navendê DBP ke derheqê xespkerdişê şaredarîyanê Mêrdîn, Wan, Sêrt û Dersim de damûstayîn da û vist vîrî ke xêlê hemşaredar û îdarekarê înan rehîn ameyê giroten û hurendîya ci de qeyûm tayîn bîye. DBP da zonayen ke AKP dûştê pêrokîn mûxalîfan de lej (şer) dayo destpa kerdiş. DBP vist vîrî ke AKP êşkena bi zorê polîs û dewletî şaredarîyan îşgal bikero, la nêşkena şarî îdare bikero.
Damûstayîn de vajîya ke şarê Kurd do verra polîtîkayanê herbî yê AKP de ti wext teslîm nêbo û do bi xoverdayiş cewab bido.
NAVENDÊ XEBERAN