Sîsê Bîngola 85 serrî ya ke nizdîyê di serran o zindanê Tarsûsî de yena tepiştene û rixmê heme nêweşîyan û serranê ci nîna tehlîyekerdene, 2ê Teşrîna peyêne de rewşa aye bibi xidar û sewqê nêweşxaneyî bibî.
Kênaya Sîsê Bîngole da zanayene ke aye waşt ke bibo refaqatkerdoxa maya xo û semedê naye muracatê dozgerîye kerdo la dozgerîye cewabê ci nêdayo. Derheqê rewşê weşîye yê Sîsê Bîngole de zanayîş bi dest nêkewt. Goreyê zanayîşan Bîngole nêweşxane de raporê heyetî pawena.
Heto bîn de Hemserekê HDPyî yê qezaya Pêrtagî ya Dêrsimî Erdal Kotan ke Zîndanê Xarpêtî de tewqîfkerde yo, aşmêk verê seba ke kongreya partîya xo rê mesajê pîrozkerdişî erşawito, derheqê ci de tehqîqat abîyo û 13 rojî cezaya hucreyî dîyayo ci.
Xeylê neheqîyan ma ser o ferz kenî
Kotanî babete ser o wina vato: “Mesajê mi ser o bi hawayo kêfî mi rê tehqîqat abi. Seba ke ez moral bida embazan, mi bi rayîrê faksî mesaj erşawit embazan rê. Bi no qeyde seke ez endamê partîyêka îlegale biba, hereket kenî. Nuşteyê mi çarçewaya azadîya fikrî de bi. Ez nizdîyê 10 aşmî yo tewqîfkerde ya û tîya de xeylê neheqîyî ma ser o yenî ferzkerdene. Her roje zext û tedayanê psîkolojîkan ma ser o kenî.”
AMED