Yew vatena raşt ê Osmanîyan esto. Vanê ke; “Lîsanî beyan ayanı însan”. Yanê wazenê vajerê ke mezgê to, fikrê to, sîndorê asoyê to çiyo se, no ma bi rayîra ûslib û ziwanê to xo dano teber.
Qabê cay ûslib tenya çekûye ke fekê ma ra vejîyenê nîyê. Ziwanê ma aweneya mezgê ma ya. Hayîra ma ti ra estbo zî, çinbo zî, her çekûyo ke fekê ma ra vejîyeno, raştîya ma rafîneno çiman ver.
Eke ma bi no çimî mijarî bigirê dest, yeno vînayene ke di sîyasetê Tirkîyayî de yew pirsgirêkê gird yê ûslibê esto. Kam fekê xo akeno se yo bînî rê lengi çineno. Çîyê ke pê rê vanê, şar qehweyan de pê rê vajê se ganî yeno rijnayene! Ne namûsê pê, no heysiyetê pê, ne zurkerîya pê, ne zî dizdekeya pê veradanê. Bi taybetey zî fekê Tayîp Erdoganî bol şehityaye yo. Çi yeno fekê ci se bêqontrol rafîneno raşte.
Helbet ê binî zî ti ra yew pêşwazeyî mîyan. Kam ê binî ra vêşêr; lengî biçîno û çekûyanê argo bigurwêno, çepikê şarê zî o gêno. Çiyo ke ganî ma pers bikerîme no yo. Sîyasetmedarê tirkî çirê di no ûslibê pederşahî de israr kenî? Yew ke nêzanibo do vajo qay Tirkîya de sîyaset, têy rê heqeret kerden o. Civakanê averşîyê no babet sîyasetî ra pirîm nêdanê. Labelê şaranê Tirkîyayî siyasetê winasînî pejirneno. Heta merdim şikîno vajo ke no babet siyasetî ra hes sî keno. Kamcîn sîyasetmedar hewna vêşî maça û paternalîst bo, hetkareya vêşêrî, hentay ke destê înan ra yeno, yew ûslibo wişk û maça esas gênê.
Propogandayê faşîzmî yeno kerdene
Yeno vaten ya, yew civak senîn heq bikero se winî yeno rayîraberdene. Di no vatenî de tayîn hêmaney estê la di esasê xo de vatenek raşt o. Ê ke ney sîyasetmedarê hêwizya û bêçap danê ciwînayîş, civak o. Civak ley û hetkareya xo nêdo se Tayîp Erdogan û mêrdekanê sey êyî nêşenê bicûyê. Labelê îta de teyna civak verpers nîya.
Ê ke pîvanê civakan ronenê raştê zî pergalê dewletî yo. Ti civakî bi kamcîn virdozî û senîn perwerde bikerê, mezg û cûyê ciwakî zî winî têşe geno. Mufredatê perwerdeyê mekteban ra tepêşe hetanî rêzefilmanê TVyan, çapemenî ra tepeşê heyanî rojnîvîsan heme çimeyanê ke civakî kenê weye, mezgê merdeko de serdest û netewe dewletî ser a ameya ronîştenen. Her rojê homayî propogandayê faşîzmî yeno kerdene. Tayîp Erdogan vatenê: “Yew yewan” fekê xo ra nêfîneno war. Hal wina bo civak zî nêşeno tendûristeya mezg û rihê xo bipawo. Faşîzm, heyanî hucreyanê înan o tewr werdî zî xo keno derg.
Ma eşkenî çareyê xo berz bikerî û vajo ke: “Sîyasetê ma de pirsgirêkê ûslibî çînyo. Fekê înan o herî pak û ûslibê înan o tewr weş, reyna sîyasetmedarê kurdî yê. Bi taybetey zî qadroyê Tevgera Azadîyê dema ke qisey kenî merdim nêwazeno qiseyê înan bixelisyo. Beno kem a zerre derîme, ekranan de sîyasetmedaranê xo hertay nêvînenîme, seweta ejî ûslibê înan ma rê hertay weş yeno. Labelê ez vana mesele a nîya.
Sîyasetê kurd bol pak o
Çiyo ke ma û şarî anceno şex zî nîyê. Çimkî tayîn şexsî estê, ê zî hetê ma de qaşo sîyaset kenê labelê wexto ke vejîyenê ekranan ver, xo vindî kenê. Yew ke nêzanibo do vajo qay wekîlê AKP an zî ya CHPî yo. Vengê xo heyanî peynî berz kenî, kenî karakar û barabar la raşteyî de çiyê çinyo. Xora sewata ke sereyê înan mîyanî de çiyên çinyo, hentay karakar kenê. Tewr vêşî MHP no babet sîyaset keno. Çer tenî qadroyê înan o harmeyê hadrekerdiş estê, şew û şodir kanal kanal geyrenê û heyanî ke alişkanê înan bibo sipsûre qijînî keweno fekê înan ser o. La virdozîya ma de şopê qarekterê cenîyan est o. Yeno wateya, destê cenîyan qinabo cayên û ca pak û pêsero yo. Sîyasetê kurdî de zî destê cenîyan est o. No sîyaset bi hest û ramananê cenîyan ameyo riştene.
Qabê cay, ûslibê sîyasetê kurd bol pak o. Helbet ma mîyanî de zî êyî ke no vîrdozîyê hewna fam nêkerdê zî estê. Labelê, êyî famkerdê wexta vejîyenê ekranan ser qisey kenê, heyecan û kêfweşey parî ra heyanî neynik heme cayê merdimî tepêşenê. Tenya no zî nê, sîyasetmedarê tirkan rê zî beno wane. Şarê Tirkîyayî bi çimanê sereyê xo vînenê ke bi babetek bîn sîyaset kerden mumkin o. Vînenê û famkenê ke sîyasetê kurd, sey ûslibê xo, pîr û pak o.
Heme vengê xo berz kenî
Persgirêk mezg û virdozîyê de yo. Ûslibê ê bînan, sewata ke virdozîyê înan bi mezgê pederşahey û faşîzm ameyo riştene, wina şehityaye yo. Çimkî faşîzm mîyanê xo do nezdîbîyayîşên eril weye keno. Êrîley zî paştîya xo dano tundrawey û zordareyî. Êyî winasîn vanê qay do bişîkîyê heme persgirêkan bi zordarey çaresar bikerê. Sewata nêy zî hama heme kesî rê vengê xo kenê berz û zerrîya heme kesî şiknenê.