Dayîkê Aştîye ke seba wedarnayîşê tecrîdî kewtî grevê vêşanî, derheqê tecrîdî de qisey kerdî û waştî ke Rayberê Şarê Kurd Abdullah Ocalan serbest bêro veradayîş.
Dayîkan ra Rabîa Aslane va ‘êdî tehamulê ma nêmendo, wa Rayberê ma azade bibo’ û dîyar kerde ke tecrîdkerdişê Rayberîye tecrîdkerdişê heme şaranê bindestan o; cok ra wa tecrîd bêro wedarnayîş.
Emîne Erbeke zî tecrîdî şermizar kerde û va ‘ganî dayîkî destê yewbînan bigîrî û tecrîdî bişiknî’. Dima ra Nacîye Şahîne zî wina va: “Ma wazenî ke tecrîd bêro wedarnayîş û Birêz Ocalan azade bibo. Wa Ocalanî serbest veradî, veradî, veradî.”
Kilîtê aştîye Ocalan o
Dayîkan ra Rihan Akgule zî arde ziwan ke eke tecrîd bibo, o wext yeno manaya ke aştîye çin a û wina domnaye: “Eke Rayberîye verabidî, o wext aştîye bena. Çimkî kilîtê aştîye Ocalan de yo.” Dayîke Şemse Aslane zî dîyar kerde ke ê nêwazenî çi leşker û çi zî gerîla bimiro û wina va: “Wexto ke Ocalanî reyde pêvînayîşî estbî, o wext huzir estbî. Birîyayîşê pêvînayîşan ra dima şer dest pêkerd.”
Dayîke Ezîne Dale zî bale ante çalakîyê ke benî ser û wina va: “Şîyayîşê heyetî yê Îmrali qîm nêkeno, ganî Ocalan azade bibo.”
Ma azadîya ci wazenî
Dayîkan ra Sakîne Guvene zî va ‘êdî çîyêko bêro vatiş nêmendo, Rayberîya ma verabidê û êdî wa na gonîye nêrijîyo’. Dayîkan ra Aklîme Keskîne zî wina va: “Ma zî sey herkesî azadîya Rayberîya xo wazenî. Heme dinya zana ke Rayberîya ma seba ma zaf erjîyaye yo. Ma azadîya ci wazenî.”
Guler Bugdaye zî daya zanayîş ke azadîya Ocalanî azadîya heme cinîyan a û wina domnaye: “Eke tecrîd nêwedarîyo, o wext do krîz û mergî dewam bikerî.”
MA/STENBOL