Çend rojî verê hêrişê cenazaya Dayîka Aysel Tugluke Hatun Tugluke ameybî kerdiş û hedîse ver çend kesî ameybî tepiştiş. Nê kesan ra zî tayê tewqîf bîybî. Seke yeno zanayîş hêrişkaran wexto ke hêrişê cenazeye kerdbî, vatbî ‘ma tîya de armenî nêdanî definkerdiş’, labelê Wezîrê Karê Zereyî Suleyman Soyluyî vatbî ‘mi sere ra heta peynî heme dîmenî temaşe kerdî, ewja de çîyêko winasî nêameyo vatiş’.
Ame musayîş ke kesê ke hêrişê cenazeye kerdbî înan ra Cemîl Ozdemîro ke tewqîf bîbî, îfadeya xo de vato ‘Tîya goristanê Komara Tirkîya yo, tîya goristanê armenîyan nîyo’. Murat Alpo ke Soyluyî reyde fotograf antbî zî îfadeyê xo de vato ‘mi pêrodayîşî cîya kerd’. Heto bîn ra Soyluyî seba fotografî vatbî ‘ma fotografî hedîse ra dima anto’, labelê goreyê îfadeyê hêrişkaran, hêrişkarî hedîse ra dima nêşîyî qereqol, şîyî keye.
Seba ke nînî muhakemekerdiş benî
Babete ser o avûkatê Hrant Dînkî Bahrî Belenî qisey kerd. Belenî wina va: “Semedo ke Tirkîya de sucê nefretî ser o tehqîqat nîno viraştiş, herişkarî cesaret gênî û hêrişê neweyî virazîyenî. Eke wina bidomîyo, o wext ma do senî bêrî têhet û pîya bicuyî. Qiseykerdişê Soyluyî de nakokîyî estî, reyna hêrişkaran reyde fotograf antişê Soyluyî nîno qebulkerdiş. Ganî lîderê sîyasî vera sucê nefretî de hesas bibî. Ganî wina bibo ke ti kesê nêewtaro hêriş bikero.”
MA / ANQARA - STENBOL