Peynîya hefteyo ke ravêrd de, Stokholm de xeylê çalakîyê kulturî û sîyasî virazîyay. Hefteyî bi mitîngê protestoyî yê seba hepiskerdişê Selahattîn Demîrtaş û embazanê ey a dest pa kerd. Dima şanê eynî roje de konserê Mikaîl Aslanî yo kirmanckî est bi û ê konserî xeylê kurdê Stokholmî arê dayî pê ser. Peynî de zî semînera serokê PYD Salih Muslimî este bî.
Fina siftê bî ke Stokholm de bi kirmanckî konserê ameyê organîzekerdiş û hunermendêdo zey Mikaîl Aslanî yo namdar beşdar bîyê. Co ra konserê Mikaîlî, konserêndo tarîxî bi. Mikaîlî dêrê xo bolkî dimilîya Sêwregi ra weçînay bî. Nay zî rengêdo cîya da konserî.
Qiseyê Mikaîlî yê konserî zî zaf kurdistanî bî. Ey va ”sebebo ke serokanê partîyanê ma, parlamenteranê ma, şaredaranê ma kenê hepis, şaredarîyanê ma rê kayim tayîn kenê, pêro no ziwanê ma yo. Wazenê ma bi nê ziwanî ya qisey nêkerê û ma vinî bibê.”
Bi seyan a kurdê kirmancî (zazayî), kurmancî û soranî amey bî goştareya Mikaîlî. Bi no awaya konser de resmêndo xasek asayê. Kesî hem salona konserî de hem zî mabên de coş û sempatîyêdo gird û germ seba kirmanckî hîs kerdê.
Rolê Swêdî, tarîx û averberdişê ziwan û kulturê kurdî de zaf gird o. Mabênê serranê 1980-2000î de Swêdî averbîyayîşê ziwan û kulturê kurdkî de rolêndo gird kay kerd.
Kovarê domaman yê bi alfabeya latînî fina sifteyêne Swêd de neşir bî. Serra 1980ê de kovara domanan Kulîlk û serra 1981de zî kovarê Hêvî û Hêlîn vejîyayî. Redaktorê nê wirnanê peyênan Mahmûd Lewndî bi. Kitabê domanan yê verênî serra 1981ya tepîya Swêd de vejîyayî. Nê kitaban ra yew zî kitabê Astrîd Lindgrene ”Pîppîya gorederge” bi. 1984 de Unîversîtaya Stokholmî de qismê mamostayîya kurdkî abîya. Kitabê derse ê latînî ê modernî ”Em bixwînin” û ” ”Em binivîsin” serra 1985 de Swêd de vejîyayî.
Verdibistana (kirêş) kurdanê vakurî ya verêne zî serra 1984î de Swêd de awan bî. Dewleta tirkan, serra 1985 de semedê awankerdişê na verdibistanê Swêd protesto kerd. Labirê dewleta Swêdî goş nêda tirkan a û a verdibistanê xebata xo dewam kerde.
Swêd de xeylê nuştox û şaîrê kurdkî zî resay. Mehmet Uzun, Firat Cewerî, Ihsan Espar, Hesenê Metê nînan re çend tene yê.
Grûba xebate ya Vateyî zî serra 1996î de Swêd de awan bî û eynî serre de dest bi xebata xo kerd. Kovara Vateyê 1997î de Swêd de dest bi weşana xo kerd. Homara sifteyêne û heta 20ine Swêd de vejîyê. Endamê redaksîyonê Kovara Vateyî yê verênî zî pêro kurdê kirmancî yê ke Swêd de roniştê bî.
Nê xebatî pêro Stokholm de amey viraştiş. Co ra averberdiş û seveknayîşê ziwan û kulturê ma de cayêndê Stokholmî yo taybetî esto.