Verra rehîngirewtişê parlementeranê HDP û dûştê zilmê qesra AKP nûmayişê protestoyî welatanê Awrûpa de zî ramenê. Roja Şeme xêlê welatan de bi des hezaran Kurdistanijî û dostê ci vejyay meydanan. Nûmayişanê ke Parîs, Koln, Hambûrg, Berlîn, Zurîh, Madrîd, Pîsa, Graz, Salzbûrg, Swêd, Den Haag, Toronto, Londra, Stockholm, Malmo, Orebro, Uppsala, Rûsya, Atîna, Japonya-Tokyo de virazîyay de kerdenanê faşîstîn ra vajîya “Stop Erdogan.”
Sûka Almanya Koln de dûştê operasyonê qirkerdişê sîyasî 20 hezar kesî vejyay kuçeyan û slogana ‘Dîktator Erdogan’ berz kerdî. Nûmayiş de dûştê faşîzma AKP vengê berzkerdişê tekoşîn ame dayen.
Nûmayişo ke hetê NAV-DEM, AABF, HDH, ABDEM, YJK-E û xêlê rêxistinan bi slogana “Şaranê xo yê Tirkîyeyî nêkenime teslîmê faşîzmê AKP-MHP” virazîya seat 13.00 de Ebertplatz de destpa kerd. Nûmayiş de pankartê zey “Destê xo ser HDP û parlementeranê ci ra biance”, “Dûştê faşîzmî doş bi doş”, “Kiştox Erdogan” abîyay û sloganê zey “Vizêr Hîtler, ewro Erdogan” û “Biciwe HDP” qîrîyay. Jû seat rayşîyayişî ra dima şêlig resya Heumarkt û mitîngeke viraşt.
Erdogan seba herkesî taloke yo
Hemserokê KCDK-E Yuksel Koç ke mitîngî de qisey kerd va, ‘Selahattîn Demîrtaş û Fîgen Yuksekdag ma, tabloyê îta temsîl kenê. Koçî vist vîrî ke HDP vengê pêrokîn şaran o û aşkere kerd ke Erdogan o ke tehamulê weçîntayişanê 7ê Hezîran nêkerd, HDP û kurdan hedef girot. Koçî va, nê sereştişî ma quwetir kenê. Dogûş Alî Bîrdal ke ser nameyê Yewîya Quwetê Demokratîkî qisey kerd zî pîyakarîya Almanya û Tirkîye rê nêrazîbîyen damûsna û vist vîrî ke çîyê ke Tirkîye de yenê kerden derbeyekê ye.
Hemserokê Partîya Çep yê Alman Bernd- Rexinger zî waşt ke hurdî Hemserokî ca de serbest veradîye û va, ganî însanî rîwalê fikranê xo nîrê tepiştiş, no yew dîktatorî yo. Rexingerî vist vîrî ke sûcanê Erdoganî ra Merkel û Yewîya Awrûpa zî mesûlîyê û veng da hikûmeta Merkel ke eleqeyê xo bi AKP ra bibirno. Rexinger aşkere kerd ke Erdogan tenya seba Tirkîye nê, seba pêro dinya taloke yo.
‘Milê xo çewt nêkerê’
Serokê AABF Huseyîn Matî zî aşkere kerd ke zext û zorvajîyê AKP dê înan nêşikînê û va, ‘Ma Kurdî, alewî, şoreşgerî, ma dê ti wext milê xo çewt nêkerê.’ Mitîng de xêlê dezgeh û rêxistinan mesajanê xo day. Dima ra hozan Dîyar, Denîz Deman û hozan Cewad vejyay sehne û deyrê şoreşgerî vatî. Paytexta Almanya Berlîn de zî derbeya AKP ya verra HDP hetê hezaran kesan protesto bî. Kurdistanijî û dostê ci ke rixmê varonî Kleispark de are bî heta Meydanê Wittenberg rayşî. Rayşîyayişî ra dima mitîngeke virazîya û kerdenanê faşîzan yê Erdoganî ra hêrseke berz damûsnîya. Hambûrg de zî bi eynî meqsedî bi nûmayişeke protestoyî nêrazîbîyen damûsnîya.
Faşîzm mehkûmê vinîkerdişî yo
Paytexta Belçîka Brûksel de badê nûmayişê roja Înê yê ver Parlemetoyê Awropa, roja Şeme zî nûmayişê protestoyî ser vengdayişê TJK-E virazîya. Kurdî û dostê ci ke ver Îstasyonê Tren ê Central de are bî. Şarê Amazigh û tayî komê çep ê Belçîka zî destek day nûmayiş.
Parlementerê HDP Tûgba Hezer û Faysal Sariyildiz zî tewrê nûmayiş bî. Hezer qiseyanê xo de vist vîrî ke Tirkiye de derbe û faşîzm her ke şino xorîn beno û va faşîzm mehkûmê vinîkerdişî yo. Faysal Sariyildizî zî xîtabê şêligî kerd û aşkere kerd ke serdestî zerreyê tersî de yê û va, ‘Her ke tersê înan gird beno, bê exlaq benê û hêrîşê pêro erjayeyan kenê.”
‘Tirkîye bi dişmenanê ma pîyakarî kena’
Jew cayo bîn ke protestoyeke gird virazîya paytexta Fransa Parîs bi. 30 hezar kesê ke tewrê nûmayiş bî, rîwalê zilm û zorvajîye vatî „Stop Erdoğan” û mesajê “Ma dê bedel bidê la çokan nêdê ro” day.
Namzedê reîscûmhûrîye Fransa ra Jean-Luc Mélenchon ke tewrê nûmayiş bi aşkere kerd ke ‘DAİŞ bi hêrişanê Bataclan û Charlie Hebdo qetlîam viraşt. Ê dişmenê ma yê. Tirkîye bi nê dişmenanê ma pîyakarî kena.
Bi hezaran kesê ke roja Şeme seat 16.00 de Meydanê Rêpublique de are bî û bi slogananê “Stop Erdoğan“, “Dewleta faşîst Kurdistan ra def bi” heta Meydanê Chatlet rayşî û mitîngeke viraştî.
Erdogan wazeno bibo Siltan
Mitîng de Serokê Cepheyê Çep yê Fransa û namzedê reîscûmhûrîye Fransa ra Jean-Luc Mélenchonî mitîng de qisey kerd û vist vîrî ke parlementerê HDP, parlementerê kurdan û yê Tirkîye yê. Mélenchonî aşkere kerd ke Tirkîye rîwalo ke vernîya tekoşîna dûştê DAIŞ bigîro dîktatorî ronena û va, ‘Ganî dewleta Tirk bi Kurdan ra ronişo mase. Wekîlê Parlementoyê Awrûpa Patrîck L’Hyarîcî zî dîyar kerd ke ganî pêrokîn çormeyê demokratîk vajê “Stop Erdoğan.” L’Hyarîc vist vîrî ke Erdogan dîktatorî ano çike wazeno bibo Siltanê heremî, dûştê nayî de Kurdî vindenê û waşt ke parlementerê HDP û Ocalan serbest veradîye.
Herzewbîn nûmayişanê Zurîh, Madrîd, Den Haag, Pîsa, Graz, Salzbûrg, Toronto, Londra, Stockholm, Malmo, Orebro, Uppsala, Rûsya, Atîna, Japonya-Tokyo û xêlê cayanê bînan de zî des hezaran kesî vejyay meydanan û rehîngirotişê parlementeranê HDP protesto kerdî.
NAVENDÊ XEBERAN