Goreyê plansazeya HDP yê Newroz, nûmayişê peynî yê Newroz do zey merasîmê vîrardişê şehîdan, Cizîr de viraziya be. 

Cizîr de welatijî vizêr serva nûmayişê fînalê Newroz vejiyay meydanan. Dewleta ke qeza de qetlîamê girdî viraştî, îradeyê şarî ra tersiya pêrokîn qeza girot bin ablûqe û xêlê kesî girot bin çiman.  Pêrokîn qezayanê Şirnex ra welatijan seatanê sodir ra tepya verê xo day hetê Cizîr. Herzewbîn hemserokanê HDP, DBP, KCD, HDK ra piya heyetê HDP ke Amed ra kewtî ray verê xo day hetê Cizîr. Malbatê şehîdanê xoverdayişê Cizîr ra piya, Cizîrijî ver bana DBP de are bî. Pî û maya Mehmet Yavûzel zî serva vîrarden verê xo day Cizîr. Rêxistina Efû ra zhi 8 akademîsyenî hetê Cizîr kewtî ray. Quwetanê dewlet bi wesayîtanê zirxî, bi seyan tîmanê teybet çormeyê bana qeza yê DBP girot bin ablûqe. Qûwetanê dewlet dest nay otobusa anonsî yê HDP ser, şofor û teknîsyenê otobus girotiyay bin çiman. 


Heyetê HDP vinderniya

Heyetê HDP ke zereyê ci de Hemserokê HDP Selahattîn Demîrtaş û Fîgen Yuksekdag, Parlamenteranê HDP, Hemserokê KCD Hatîp Dicle û Selma Irmak, qiseykerdoxê HDK Gulîstan Koçyîgît û Ertûgrûl Kurkçu, Hemserokê DBP Kamûran Yuksek, Azayê Kordînasyonê KJA ca girotî Amed ra hetê Cizîr kewtî ray. Verniya heyetî 20 kîlometre dûrê qezaya Şirnex Hezex de, dewa Basiprîn de girotiya û heyet bi seatan vinderniya. 

Ser nay, Hemserokê HDP Demîrtaş’î damustayin da û aşkere kerd ke, badê kerdenanê 3 aşmî yê Cizîr înan waşt ke şarî ziyaret bikerê. Demîrtaş’î da zonayen ke, heteyê înan bê ke sebebê hiqûqî bibê vinderniya yo û wina va: “Heyetê ma bi fermanê walitî vinderniya. No çiyê do normal niyo. Eke jew welatî de jew reîscûmhûr vajo ‘ez qerarê mahkeme nêsilasnena, hurmet nêdana’, waliyê ci zî wina keno. Eke îmamê ci winî bo, cemaatê ci zî wina yê”. 


Piyakarê terorî

Demîrtaş’î vist vîrî ke waliyê Şirnex ameyo tayîn kerdin û va ma ameyê weçînayen. Demîrtaş’î diyar kerd ke, walîyo ke tayîn biyo, xo zey hukumdarî vîneno û wina va: “Xo ra qanûn, hiqûq çinyo, la nayî ra tersenê: Cizîr de jew sûcê do giran yê merdimatî qewimî. Waliyê Şirnex, Qeymeqamê ci, Serokwezîr, Reîscûmhûr û qûwetê ‘tîvarîye’ ke na ferman ard ca, pêro piya sûcêdo giran yê merdimatî kerdî. Tersenê ke no sûc bivejyo werte. Cok ra nika panîk biyê. La sûcanê merdimatî de ‘wext ravêrnayen’ çinyo. Hetê mavênneteweyî taqîbatê nay do bibo û hesabê ci do bîro persayiş. Nayî zanê, cok ra şiyayişê ma yê Cizîr manî kenê.” 

 Hemserokê HDP Selahattîn Demîrtaş’î aşkere kerd ke Tirkiye bi qanûnanê birrî (daristan) yena îdare kerdin û hayr ant paştdayişê Tirkiye serva teror’î ser: “Hikûmet açarniya piyakara teror. Açarniya hikûmeta ke teror kena. Açarniya hikûmeta ke desteg dana çeteyanê DAIŞ, Ehrar El Şam, Nusra û înan warî kena”. Demîrtaş’î va, walî ra piya, yê ke ameyê tayînkerdiş, serva ma hikmê çinî de yê. Bi zorê tanq, top, panzer û copî êşkenê tiya de bimanê û wina dewam kerd: Hetê şarî nêameyê weçînayen, şar înan nêwazeno. Qetlîam, zilm û îşkence ramenê. Bi zihnîyetê dagirkerî hewl danê kurdan û welatê ci teslîm bigîrê, la ê dê ti wext nêşê no welatî teslîm bigîrê”.  Hemserokê HDP va, xêlê walî, wezîrî, qontra-gerîlayî amey û şî, la no şar her tim tiya de bi. Demîrtaş’î da zonayen ke, no zihnîyet do sernêkewo û tekoşînê înan do dewam bikero. 


Şarî ablûqa qeleşna

Bado ke heteyê HDP ame manîkerdiş, Parlamenteranê Şirnex Faysal Sariyildiz, Bedîa Ozgokçe, Huda Kaya, Mehmet Alî Arslan û Besîme Konca damustayin day şêligo ke ver bana DBP de are bî. Mehmet Alî Arslan’î qisey kerd û aşkere kerd ke ‘Newroz mijdaniya wesarî ya. Şarê Cizîr û Kurdistan zî do zey xoza wesar de zîl bido.  Badê damustayîn Cizîrijan bi sloganê “Kiştox Erdogan do hesab bido”, “Ocalan”, “Bicuw xoverdayişê Cizîr”, “Kiştox dewlet do hesab bido” destpa rayşiyîn kerdî. Ser nay polîsan bi wesayîtanê zirxî êrişê şarî kerdî. Rexmê nay Cizîrijî vila nêbî û bi slogana “Kiştox dewlet do hesab bido” şî ser wesayîtanê zirxî. Welatijan ablûqayê quwetanê dewlet qelêşna û verê xo day zereyê sûk. Ser nay, quwetanê dewlet qewşaxê Dortyol de, bi bombeyanê gaz êrişê şarî kerdî. Ser nay pirodayiş vilayê xêlê mehleyan bi. Polîsan zew domanî girot bin çiman.  


 DÎHA/ŞIRNEX





Startê tekoşîn a


Hemserokîna Konseya Rayverîn yê KCK da zonayen ke rexmê pêrokîn zext, zorvajî û tehdîdan şarî ‘Rayberê azad, Kurdistan’a xoser û Tirkiyeya demokratîk’ de qerardariya xo rafîna ver çiman. 

Damustayin de vajiya ke îxtidara AKP, şeş aşmiyo êrişê cayanê ke xorayirberdişî îlan kerdî kena û hewl dana îradeyê şarî bişikîno û wina vajiya: “Rexmê qedexe û propagandayê siya yê AKP, şar vejya meydanan û Newroz bimbarek kerd. Newroza Amedî de se hezarî kes tewr bî û ‘Rayberê azad, Kurdistan’a xoser û Tirkiyeya demokratîk’ de qerardariya xo damusna.  KCK vist vîrî ke Kurdistan ra heta xêlê cayanê dinya, kurdan Newroz bimbarek kerd û da musnayen ke omidê ci yê cuwyana demokratîk nêşkeno bîro şikiten. 


Açarniya kongreyê şaran 

Hemserokîna Konseya Rayverîn yê KCK ard ziwan ke Newroz’a 2016î açarniya kongreyê  şarî ke qîrkerdişê xoverdayiş bi û damûstayin wina dewam kerd: “Newroz fina damusna ke şarê ma quwetê demokratîkê esasî yê Tirkiye yo. Newrozê 2016î açarniya jew platformo ke startê tekoşîn û xoverdayişî yo. Ti quwet nêşkeno îradeyê azadî yê şarê ma bişikîno. Tekoşînê şarê ma yê bi rihê Newroz do Dehaqan birişo mezelxaneyê zaliman.”  


 ANF/BEHDÎNAN