PKK: Qirkerdişê Parîsî hetê hêzanê faşîst-qirkerdoxan ê ke estbîyayîşê problemê Kurdî ra weyî benê ame kerdene. No hêriş hêrişêko vernîgirewtişê halkerdişê problemê Kurdî bi.

Koordînasyonê Komelê Cinîyanê Kurdistanî (KJK) û Komîteya Rayberdişî ya PKKyî bi wesîleya serrgêra qirkerdişê Parîsî eşkerayîyêka nûşteyî daye.

Komîteya Rayberdişî ya PKKyî derheqê serra 6ine ya qirkerdişê Parîsî de eşkerayîyêka nûştekîye daye û vat: “Parîs de roja 9ê Çile de kişîyayîşê hemrayê ma Sara, Rojbîn û Ronahîyan hetê MÎTo ke binê rayberîya Tayyîp Erdogan û Hakan Fîdanî de bi ame plankerdene û organîzekerdene.”

Eşkerayîya Komîteya Rayberdişî ya PKKyî wina ya:”Ma bi minet awankerdoxanê partîya ma ra û mîlîtana mucadeleyê azadîye Sakîne Cansize (Sara) û mîlîtananê partîya ma Fîdan Dogane (Rojbîn) û Leyla Şaylemeze (Ronahî) serra 6ine ya kişîyayîşê înan de bi vîr anê.

Dewletê Ewropa rasterast qirkerdişî ra berpirsîyar ê

Mumkun nêbi ke hêrişêko winayên bê paştîdayîşê Fransa û tayê hêzanê Ewropa bêro viraştene. Naye ra Fransa û dewletê Ewropa rasterast qirkerdişî ra berpirsîyar ê. Peynîya tehqîqatê dergî yê çar serran de vejîya werte ke no qirkerdiş bi fermanê hukmatê AKPyî hetê MÎTî ra ameyo kerdene.

Hewna ke yew menge mendebî ke mehkema dest pê bikero kiştox Omer Guney zîndan de ame kiştene û vernîya muhakemebîyayîşî amî girewtene. Bi nê hawayî sûcdarê esasî yê sey Tayyîp Erdogan, Mehmet Alî Şahîn, Huseyîn Çelîk û Hakan Fîdan ameyî pawitene. Eşkera yo ke Fransa seba menfaatanê qijan vernîya nê meseleyî gêna. Ma wazenê ke no hal hendî bivurîyo; îdareyê Fransa mesuldarîya xo bica bîyaro, sûcdaran eşkera bikero û muhakeme bikero.

No hêriş gama ke Rayberê Şarê Kurdî Abdullah Ocalanî dir pêvînayîşî ameyêne kerdene virazîya. Bi nê hawayî înan waşt ke vernîya halkerdişê problemê Kurdî bigîrê. Yanî no qirkerdiş hetê hêzanê faşîst-qirkerdoxan ê ke estbîyayîşê problemê Kurdî ra weyî bîyêne ame kerdene.

Hetê hêzano komplokerdoxan ra ameyo organîzekerdene

Rayber Apoyî no qirkerdiş sey dewamê komployanê 9ê Teşrîna verêne û 15ê Sibate ercna û îfade kerd ke no hetê hêzano komplokerdoxan ra ameyo organîzekerdene. Eke bi xoverdayîşî vernîya hêrişê komplokerdoxî yo ke bi qirkerdişê Parîsî dest pêkerdibi nêameyêne girewtene û Têgêrayîşê Azadîya Kurdistanî xo aver nêberdêne do vernîya DAÎŞî nêameyêne girewtene û Rojakewtena mîyanêne de çetekarîya faşîste serdest bîyêne.

Eke ma bala xo bidê ci ewro zî hêzanê ke qirkerdişê Parîsî viraştê çar perçeyanê Kurdistanî de û teberê welatî de qirkerdişan ê Kurd û cinîyan domnenê. Înanê ke vizêr Sara, Rojbîn û Ronahîyan qetil kerdî ewro zî Avesta, Delal û Zekîyan qetil kenê.”

Cuya Cansize ramotişê rayîrî domnena

KJKyî jî qirkerdişê Parîsî yo ke kewt serra xo ya hewtine reyna bi hêrs û nefretêkê pîlî şermezar kerd. KJKyî vat: “Sakîne Cansize raybera mucadeleyê azadîya cinî ya, aye bi mucadele, xoverdayîş û cuya xo ramotişê rayîrî domnena.”

Eşkerayîye de ca dîya nînan:”Ma qirkerdişê Parîsî yo ke kewt serra xo ya hewtine bi hêrs û nefretêkê pîlî şermezar kenê. Ma hemrayanê xo Sakîne Cansize, Fîdan Dogane û Leyla Şaylemeze bi hesret, heskerdiş û girêdayîş bi vîr anê. Ma soz danê înan ke ma do bi serkewtişê mucadeleyê azadîya cinîyan û azadkerdişê Kurdistanî vîrardişê înan rê bibê cewab. Ma reyna sîyasetkarê Kurdan Sevê Demîr, Fatma Uyar û Pakîze Nayira ke 4ê Çile 2016 de Silopî de hetê dewleta Tirkî ra ameyî qetilkerdene bi vîr anê û anê ziwan ke ma do hesabê nê faşîzmê AKPyî yê kiştoxê cinîyan ra bipersê.

Eslê xo de Rayber Apo ame hedefgirewtene

Dewleta Tirkî ya ke fehmê cinsîyetperwer û miletperwerî ra weyî bena cinîyanê ke hemverê nê de vejîyenê qetil kena. Mucadeleyê azadîya cinîyan o ke bi serkêşîya hemraye Sakîne Cansize aver şino ewro bîyo wayîrê karakterêkê unîversalî. Nê averşîyayîşî çimê dewleta Tirkî tersnayê sere de Sakîne Cansize bi qetilkerdişê cinîyan ê sîyasetkaran ê Kurdan waşto ke bi cinîya Kurde game pey de bido eştene. Heman wextî de waşto ke mucadeleyê azadîya cinî yo ke Rayber Apoyî sey ‘xebata min a tewr ercîyaye’ name kerdebî bifetisnê. Bi qetilkerdişê Sakîne Cansize ameyo eslê xo de Rayber Apo ameyo hedefgirewtene.

Seba Fransa leymêko sîya yo

Qirkerdişê Parîsî yê 9ê Çile bi fermanê R. T. Erdoganî û bi koordînatorîya MÎTî hetê endamê gladyoya Tirkî ame bicaardene. Dima ra mergê Omer Guneyî yo bişaîbe ramot ke qirkerdişê Parîsî bi hemkarî û bazarîyanê leyminan ameyo kerdene. Heta Fransa nê qirkerdişî nêkero zelal do no seba dewleta Fransa û îdareyê ci sey şermêk û leymêko sîya bimano. Ganî cinîyê Fransa, hêzê çep û demokratî bi mucadeleyêkê hîna xurtî berpirsîyaran vejê werte û hesabê nê qirkerdişî bipersê.

Sakîne Cansize yê ewroyî ya

Ma nika prosesêk ke maneno hêrişê 9ê Çile ra ravêrenê. Hêrişê ke serê Rayber Apoyî û Rojava de yenê kerdene zî bi nê hawayî yê. Ma sey hemra û wendekarê Sakîne Cansize ma do bi goreyê hişmendîya mucadeleyî tê bigêrê û vîrardişê hemrayanê xo yê ke cîgêrayoxê Raştîye bîyî rê bi xurtkerdişê mucadeleyî bibê cewab. Hemverê hêzanê komplokerdox û qirkerdoxan de xeta hemraye Sakîne Cansize de êyê ke sere de xo ver danê reyna cinî yê. Çalakîya Leyla Guvene ya ke îfadeyê kulturê xoverdayîşê hemraye Sakîne Cansize ya ewroyî ya delîlê bêmergîya nê ruhî ya. Ma azadîya Rayber Apoyî ancax bi nê hawayî eşkenê bica biyarê û kiştoxan ra hesab bipersê.

Kiştoxî ancî xelet fikiryayî. Hemraye Sara hendî bîya temsîlkara nasname û şexsa serkêşe ya cinîyan ê dinya. Aye hendî serkêşe Roza ya şaran û cinîyan ê heme dinya ya. Nê bingeyî de ma heme hêzanê ke qirkerdişê 9ê Çile de ca girewtê bi nefret şermezar kenê.”