GOKHAN ALTAY / MA / ŞIRNEX
Qezaya Silopî ya Şirnexî de 3ê Gulana 2017î de wesayîtê zirxinî da banêk ro û kewt zereyî banî. Netîceyê pirodayîşê wesayîtî de 2 birayê binameyê Furkan û Muhammed Yildirimî ke rakewte bî, binê wesayîtî de mendî û merdî. Hedîse ra dima şofêr û amirê polîsan rê doze amebî akerdene.
2 rojî verê doza her di kesan ame dîyayene. Xora yeno zanayene, şofêr Omer Yegît hîna mehkemeya yewine de amebi tehlîyekerdene. Mehkeme zî 2 serrî 1 aşme ceza daye Yegîtî û aye ceza zî açarnaye cezaya pereyan. Mehkeme derheqê amire ci Murat Madenî de zî qerarê beraatî da. Qerar ra dima avûkatê keyeyê Yildirimî va ‘tena o mend ke xelat bidî kerdoxan’ û dîyar kerd ke ê do îtîrazê qerarî bikerî.
Pîyê domanan Mesût Yildirimo ke heta nika beşdarê heme mehkemeyan bi, va ‘no qerar dewamê bêedaletî yo’ û wina domna: “Xelatêka girde dîyaye sucdaran. Mehkeme polîsan ra vato ‘şima baş kenî, wina dewam bikerê’. Qerar ver ma şaş nêmendî. Ma vatêne qey do qerarêko cîya bivejîyo û nika ra pey domanî nêmirî. Heme têkoşînê ma seba nêyî bi. Ez mehkeme de reyna dejaya. Çi heyf ke na dinya de qatilan qezenç kerdo. Ma înan hewaleyê Homayî kenî, xora sewbîna çareyê ma çin o. Ez hêvî kena ke yê ke nê qerarî dayî, wa rehetîye nêvînî.”