Taxê Alîpaşa û Lalebeyî yê qezaya Sûrî ya Amedî de bin nameyê ‘Vurîyayîşê Bajarî’ de rijnayîşê banan dewam keno. Heta nika beşêka girde ya nê taxan ame rijnayîş û nika zî hewl dîyeno keyeyê ke vera rijnayîşî de xover danî, bananê înan birijnî.
Saetanê serê sibayî de polîsan her di taxî bi barîyeran girewtî binê abluqa û dest bi rijnayîşê banan kerdî. Polîsan girewtişê abluqa ra dima welatîyê ke nêwaştênê keyeyanê xo veng bikerî, hewl dayî bi zorî bivejî. Her di taxî bi polîs û TOMAyan girîyayî binê abluqa. Xoverdayîşê welatîyan yê vera rijnayîşî de dewam keno. Welatîyê ke destûr nêdîyeno bikewî keyeyanê xo, hewl danî cayê ke cereyan tede esto ra derbaz bibîy û şêrî keyeyanê xo.
Ame musayîş ke abluqa û bi zorî vengkerdiş bi talîmatê Walîtîya Amedî yenî kerdiş.
Ez nêşena bicuya
Heto bîn ra keyeyê ke banê înan hîna nêrijîyayo, xoverdayîşê xo domnenî. 7 serreyî ra heta 70 serreyî her kes vera rijnayîşan de reaksîyon nîşan dano. Nê kesan ra yewe zî Kevser Zengîna 97 serreyî ya. Pîrika Kevsere 75 serrî yo ke Sûr de Taxa Alîpaşa de cuyena. Zengîne 22 sereyîya xo de sey veyveke Sêrt ra yena Amed û o wext ra nata Sûr de cuyena. Herçiqas ke ge-ge seba debara domananê xo şîya Mêrsîn û ameya, reyna zî taxa xo ra nêqerfîyaya. Pîrika Kevsere vernîya berê xo de kîlîma xo rakena û rijnayîşê Sûrî bi hawayo xemgîn temaşe kena û ge-ge zî deyîran vana. Pîrika Kevsere vana ‘se beno wa bibo, ez keyeyê xo ra nêvejîyena’ û wina dewam kena: “Nêşenî keyeyê mi birijnî, ez tîya ra nêqerfîyena. Temamê emrê mi tîya de derbaz bî. Ez nêşena sewbîna cayêkî de bicuya.”
AMED
Sûr eşq o, cuyêka demokratîk o
Babete ser o reaksîyonêk zî Zîndanê Elbîstanî ra ame. 46 hepsîyê ke Zîndanê Elbîstanî de manenî, mektubêk erşawitî û vera rijnayîşê Sûrî de reaksîyon nîşan dayî. Mektuba ke bi mabênkarîya keyeyê hepsîyan ameye erşawitiş, dîyaye Platformê Piştîdayîşê Sûrî. Mektûba hepsîyan de wina yeno vatiş: “Sûr eşq o, tarîx o û ameyoxa azad o. Cuyêka demokratîk o. Sûr ruhê Amedî, Amed zî ruhê Kurdistanî yo. Ma seba ke rijnayîşê nê cayo qedîm bêro vindarnayîş, piştî danî xoverdayîşî. Ma zî zîndan ra piştî danî kampanyaya îmzeyan ke Platformê Piştîdayîşê Sûrî dayo destpêkerdiş, benî. Ma bawer kenî ke do nê hewldayîşî serbikewî.”
Stenbol de benî qîrayîşê Sûrî
Endama Platformê Piştîdayîşê Sûrî Guzîn Alpaslane seba Sûrî Stenbol de Caddeyê Îstîklalî de standê îmzeyan akerde. Alpaslane wina va: “Sûr wayîrê tarîxêko 7 hezar serran o û xeylê şaran rê meymandarî kerdo. Kesê ke tîya de cuyenî, serranê 90î de koçî tîya kerdbîy, nika reyna wazenî înan bidî koçkerdiş. Rijnayîşê Sûrî hetêk de rijnayîşê kulturî yo. Wazenî vîrê kurdan çinî bikerî.
Cinîya bi nameyê Derya Bîngole zî va ‘seba ke hesasîyet virazîyo, ez zî beşdarê kampanya bîya’ û wina dewam kerde: “Ez Stenbol de ameya dinya. Sûr de 25 hezar keyeyî cayê xo ra benî. Wazenî merdiman bê war verabidî. Çi destê mi ra bêro, ez do bikera.”