Qezaya Sûrî ya tarîxî ya Amedî ke hetê UNESCOye ra sey ‘Mîrasê Dinya’ amebî qebulkerdiş de 2ê kanûna 2015 ra nata qedexeyê tebervejîyayîşê kuçeyan dewam keno. Qezaya ke derheqê ci de hetê Heyetê Wezîranê Qeza ra qerarê îstîmlaqkerdişî amebî girewtiş, serrêk ra zêde yo ke 6 taxanê qeza de rijnayîş dewam keno.
Babete ser o Serekê Heyetê Îdareyê Odeyê Muhendîs û Mîmaranê Tirkan (TMMOB) Emîn Koramazo ke qeza de cigêrayîşî kerdbî, qisey kerd.
Bi besmele dest bi talanî kerdî
Koramazî derheqê projeyê bi nameyê ‘Seba Sûrî Bismîllah’ yo ke hetê Wezîrê Bajarvanî û Dormeyê Mehmet Ozhasekî û AKPyijan ra 2 hewte verê dabî destpêkerdiş de wina va: “No proje reyde wazenî qeza seba rantî biakerî. Qaso ke ma vînenî bedilnayîşê planî zî seba ewleyî ameyo kerdiş. Bi no proje Sûr beno merkezê rantî. Qezaya ke tede rijnayîş û qedexe domîyeno de no proje reyde do Sûr destê amedijan ra bêro girewtiş û bidîyo dewlemendan.”
Seba înan heme çî meşrû yo
Koramazî qiseykerdişê xo de bale ant ser projeyî û wina va: “Îqtîdarî çinkerdişê Sûrî kerdo sereyê xo. Ma nê projeyî de zî dî ke cayê ke ameyî vengkerdiş benî cayê merkezê rantî. Şarê qeza cayê xo ra yenî koçkerdiş û erşawîyenî sewbîna cayan. Heta nika seba rantî bi hezaran kesî ameyî mexdurkerdiş. AKP seba ke rant vilayê dormeyê xo bikero, dest ronayo Sûrî ser de.”
Şopî yenî çinkerdiş
Koramazî peynîya qiseykerdişê xo de wina va: “Bedilnayîşê projeyî orjînalîya Sûrî xira keno û şopê ermenîyan yê peyênan zî orte ra wedarneno. Mîyanê Sûrî de 6 qereqolî yenî viraştiş û temamê qeza zî bi blokê betoninan yenî girewtiş. Wazenî bi no hawa cayêko biewle bivirazî. Ma do sey TMMOBî nê projeyo ke ameyo bedilnayîş, bikirêşî mehkeme.”
DÎHABER / AMED