Qezaya Amed Sûr de, vizêr seatanê sodir de, fina-reyna dewlet 6 mehleyan de 'qedexe'yê vetişê kuçe rona. Badê 'qedexe' çeteyanê AKP eşt mehleyan ser û xeylê kesî kerd dirbetin. Dirbetinan ra jew doman-gede yo ke 13-14 serre yo, weşiya xo kerd vinî.
Badê 'qedexe' rêxistinanê DBP û HDP yê sûk vengê nûmayişê protesto kerd. Ser na vengdayen Amedijî Meydanê Şêx Seîd de are bî. Polîsan bi guleyanê raşt êrişê welatijan kerd. Netîceyê êrişê bi tifingî yê polîsan de, tiya de jî jû cenî amê înfaz kerdin. Badê înfaz polîsan meydan girot bin ablûqe. Badê êriş, parlamenteranê HDP û rayveranê DBP ra piya xeylê kes şî hetê meydan.
Nisêbîn 'qedexe' nêsilasneno
Qezaya Mêrdîn Nisêbîn, verra terora dewlet xoverdano û qedexeyanê dewlet nêsilasnena. Verra 'qedexe' vizêr bi hezarî Nisêbînijî vejiyay meydanan.
Nisêbîn de 'qedexe'yê vejiyayinê kûçeyan roja 5. de dewam keno. Mehleyanê Firat, Abdulkadîrpaşa, Yenîşehîr û Dîcle de, teror û sereştişê dewletî dewam kenê. Welatijî şew de vejiyenê kûçeyan û bi nûmayişa veng-vetene 'qedexe' yê dewlet protesto kenê. Herzewbîn vizêr welatijî bi komî vejyay kuçeyan 'qedexe'yê dewlet bê hikum ternay.
Wesayîtê zirxî yê kobra, yê ke meydanê Newroz de bi ca bî, eştî kuçeyê Şîrîn ser. Verra êriş, welatijê ke vejyay meydanan bi nûmayişê veng vetiş cewab day hêrişan.
Heyetê HDP û DBP şi qezayan
Heta bîn ra vizêr ravêrdina wesayîta eskerî de teqînayiş bi. Wesayhita ke ser ceddeyê Çağçağ yê kuçeyê Şîrîn ra ravêriya teqînayiş bi. Netîceyê teqînayen de wesayîta zirxî xesar dî. Herzewbîn didi ambulansî şî cayê teqînayiş. Jew heyetê HDP û DBP serva-qandê destegê Dêrîk û Nisêbîn kewtî kewtî ray. Hevserokê DBP Kamuran Yuksek jî xeylê parlementeranê HDP ra piya heyet de ca geno.
Dêrik de polîsan bi bombeyanê gaz eşt ser welatijan ser
Qezaya bîn yê Mêrdîn Dêrik de 'qedexe'yê dewlet 7. roj de rameno. Dewleta ke nêşena dekewo mehleyan, destpa operasyonê binçimkedin kerd. Mehleya Tilbisim de polîsan eştî keyeyan ser û 3 welatijan girot bin çiman. Azayê Komeleyê Kiltûr yê Dêrik, serva protestokerdenê 'qedexe' waştî şirê qeza raştê êrişê cendirmeyan amey. Herzewbîn wextê hêrişê cendirmeyan de 5 welatijî girotiyay bin çiman.
Tîmê teybet bi rojano anons kenê ke welatijhi keyeyê xo terk bikerê. La Dêrikijî, yê ke bi rojano bin abluqeyê dewlet de xover danê, cayê xo terk nîkenê. Şarê Dêrik vano: Rexmê pêrokîn sereştişan 'eke ma bimirê, ma dê hardê xo de bimire'.
Vizêr seatanê şan de heyetê HDP û yê DBP resya qeza û waşt bi şarî ra piya dekewê qeza.La polîsan bi bombeyanê gaz eşt şêligî ser û teror ramit.
NAVENDÊ XEBERAN