Qezaya Sûrî ya Amedî de 2ê kanûne 2015 ra nata qedexeyê tebervejîyayîşê kuçeyan dewam keno û hêzê dewlete 6 taxan de xebatê rijnayîşî kenî. Selahîyatdarê hukmatî ke zaf reyan ameyî qeza û seba qeza qisey kerdî, herinda sozê ke dayî bikerî, xebatê rijnayîşî bi hawayo leze danî kerdiş.
Serekwezîro kehen Ahmet Davutogluyî Sûr de qisey kerdbî û vatbî ‘ma do Sûr bikerî sey Toledo’. Nika zî bîlboardê reklaman de fotografê Serekwezîr Bînalî Yildirimî ameyî aliqnayîş. Afîşê ke ameyî aliqnayîş seba daşinasnayîşê qeza ameyî aliqnayîş û afîşan de ‘Seba Sûrî Bilmîllah’ û ‘Sûr bi heskerdiş virazîyeno’ yenî nuştiş. Hetêk ra rijnayîş hema dewam keno û hetêk ra zî nuşteyê winasî yenî nuştiş û no zî beno sedemê reaksîyonan.
Projeyê 6 qereqolan
Projeyo ke hetê Wezaretîya Bajarvanî û Dormeyî ra reklamê ci ameybî kerdiş, linga projeyî ya tewr muhîm înşaatê qereqolan o. Çarçeweya projeyî de do 6 qereqolî bêrî viraştiş û nê qereqolan ra 2ê ci taxa Hasirli de, yê bînî zî Cevatpaşa, Îskenderpaşa, Melîkahmet û Alîpaşa de do bêrî awankerdiş.
DÎHABER /AMED