Rijnayîşo ke qezaya Sûrî ya Amedî dîyaybî destpêkerdiş, dewam keno. Herçiqas ke her taxa qeza bi kamerayan yena taqîpkerdiş, labelê reyna zî taxan de tiryak û fuhûş zêde bîyî.
Cinîyê ke taxe de ronîşenî, hewteyo verên pêro pîya şîyî qereqol û waştişname dayî qereqol. Babete ser o cinîyê taxijî qisey kerdî û reaksîyon nîşan dayî. Cinîyan ra Safurye Bîçîme dîyar kerde ke emrê aye taxe de derbaz bîyo û wina va: “Sûr sey cayê beg û paşayan ameyêne zanayîş. Rêzê şarî yewbînan rê estbî. Ti kes mal û milkê yê bînî ra bi çimêko xirabin nêewnîyayêne. Labelê demanê peyênan de rotişê tiryakî zaf zêde bîyo. 2 serrê peyênan de kesê ke ma nêzanî kura ra ameyî, tiryakî roşenî û bi destê înan ciwanê ma banderê tiryakî benî. Ma taxa xo de fuhûş û tiryakî nêwazenî.”
Mukrîme Canliye zî va ‘ez 40 serrî yo ke taxa Alîpaşa de cuyena’ û wina dewam kerde: “Pêrodayîşan ra dima taxe de merdimê xerîbî gêrenî. Heme cayê taxan de kamerayî ameyî bicakerdiş û mumkin nîyo ke dewlete nînan nêvîno. Tiryakî dekenî mîyanê nuşteyê ke qirika domananê 7 û 9 serreyan. Herkes nêyî zano. Ez nînan hewaleyê Homayî kena.”
Herinda çeteyan de lajê mi tewqîf kerdî
Leyla Demîra ke bi serran ra ver Mêrdîn ra koçê Sûrî kerda zî wina va: “Lajê mi zî bîbî muptelayê tiryakî. Mi se kerd mi nêşîna bida veradayîş. Amancê ma o yo ke wa ciwanê bînî bander nêbî. Çend rojî verê çeteyî eştî keyeyê mi ser û mi ra vatî ‘lajê to qarişê karê ma beno’. Heqaretê mi û kênaya mi kerdî. Ma veng da polîsan, labelê polîsan herinda ke rotoxan bigîrî, lajê mi tewqîf kerdî. Ma edalet no yo?”
MA/AMED