Serra 2009î de bi destekê Hîndîstan û sewbîna welatanê bînan hetê artêşa Srî Lanka ra bombeyî Şêrê Rizgarîye yê Elamê Tamîlî (LTTE) ser o ameybî varnayene û bi deshezaran sîvîlî zî ameybî qetil kerdene. Qetlîyam ser o 9 serrî derbaz bîyî û ti kes wayîrê tamîlanê mendeyan nêvejîya. Cok ra çend tamîlî ameyî têhet vera na rewşe de Londra ra heta Cenevre çalakîya diçerxe virazenî.
Çalakîye Londra ra dest pêkerd, do heta temsîlkarîya Milletê Yewbîyayeyî dewam bikera. Çalakîye ver bi peynîye şona. 5 çalakgêrî Hollada de Lahey, paytextê Belçîka Bruksel, Luksemburg û bajarê Saarbruckenî yê Almanya ra derbaz bîyî. Çalakgêrî vizêr zî vernîya dezgeyanê Strasbourgî de bî.
Çalakgêran Strasbourgî de çalakîya nobete ke seba Rayberê Şarê Kurdî yena viraştene, zîyaret kerd. Tîya de çalakgêrê kurdî zî aşkere kerdî ke ê destek danî çalakîya tamîlan. Çalakgêrê tamîlijî waştî ke seba azadîya Ocalanî wa dezgeyê komelê mîyanneteweyî bikewî têgêrayîşî mîyan.
Bi deshezaran merdî, dinya bêveng mende
Netîceyê şerê tamîlan û Srî Lanka ke 1983 de dest pêkerde de bi deshezaran merdimî merdbî û hakîmîya LTTE ya Srî Lanka de xeylê zêde bibî. Labelê serra 2004î de hêzê LTTEyî tayê zeyîf bibî û badê îxanetê albayo bi nameyê Vînayagamoorthy Muralîtharanî ke nameyê ci yê qodî Karuna Amman o, artêşa Srî Lanka serra 2009î de operasyonêko gird da dest pêkerdene û netîceyî operasyonî de bi deshezaran merdimî ameyî qetil kerdene.
Gêrayîşê edaletî yê tamîlan o wext ra nata dewam keno. Ewro bêvengîya Milletê Yewbîyayeyî ya vera qetlîyam û sucê merdimîye ke esîrê tamîlîyan rê ameyî kerdene, yeno rexne kerdene.
ANF / STRASBOURG