Tebîetê Dêrsimî hetê nebatan ra zaf dewlemend o. Çîgdemê Dêrsimî mizgînîya ameyîşê wisarî danî. Dormeyê newala Dêrsimî de her tewir vilik û nebatî resenî.
Goreyê cigêrayîşan Dêrsim hetê nebatan de welatanê Ewropa ra Hollanda ra hîna dewlemendêr o û sey Întîltere eynî yo. Vilik û nebatê ke Dêrsimî de resenî ti cayê dinya de çin î. Newala Munzurî hetê nebatan ra sey ‘parko milî’ amebî îlankerdiş. Dêrsimî de heta nika 518 tewirî nebatî ameyî tespîtkerdiş, 43 tewirî zî ameyî qeydkerdiş.Babete ser o Serekê Komeleya Pawitişê Cuya Tebîî yê Munzurî ke bi KHKyî ameybî padîyayîş Haydar Çetînkayayî qisey kerd.
Çetînkayayî wina dewam kerd. : “Vilikî aşma adare de akenî û heta teşrîna peyêne zî akerde manenî. Tewr peynî çigdemê payîzî qedîyenî. 2 serrî yo ke ez fotografê heme vilikan ancena û xo het de qeyd kena. Mi heta nika 650 tewiranê vilikan xo het de qeyd kerdo.”
Tebîet qetil beno
Çetînkayayî qiseykerdişê xo de wina qedêna: “Projeyê baraj û ocaxê kerrayan neslê vilikan kor kenî. Ganî ma wayîrê nebatan bivejyî û dewlemendîya tebîetê Dêrsimî bipawî. Herinda ke rindîya tebîet û serwetê milî bêrî pawitiş, bi projeyan yenî qetilkerdiş. Tirkîya qet nêewnîyena dewlemendîyan. Tirkîya hem goreyê mevzuatê xo hem zî goreyê pêvînayîşê mîyanneteweyî hereket nêkena û qanûnan îxlal kena.”
MUJDAT CAN / DÎHABER / DÊRSIM