Seba viraştişê Kongreya Neteweyîya Kurde xebatê Kongreya Komelê Demokratîke (KCD)dewam kenî. Seke yeno zanayîş ke çarçewaya xebatê Kongreya Neteweyîya Kurdistanî (KNK) de bajarê Silêmanî de 15-16ê temmuze de zî komxebatêk ameybî viraştiş.
Dima ra KCDyî seba ke herême de komxebatêk bêro viraştiş û partîyanê sîyasî û rêxistinanaê sîvîlan bîyaro têhet, xebatî daybî destpêkerdiş. Babete ser o Endama Dîvanê Hemserekîya KCDyî Mekîye Guzele qisey kerde û melûmatê muhîmî dayî.
Guzele qiseykerdişê xo de bale ante ser îlanbîyayîşê Federasyonê Demokratîke yê Vakurê Sûrîye û wina dewam kerde: “Kobanê finaka yewîya neteweyî ya. Ewro hêzê Rojhelato Mîyanênî xebatanê yewîya neteweyî asteng kenî. Heta ke yewîya neteweyî awan nêbo, Kurdistan de çîyêk nêşono sere. Nimûneyê ci zî referandûmê Başûrê Kurdistanî yo. Çimkî ewja de qerarêk neteweyî nêame girewtiş. Kurdî reyna zî wayîrê referandûmî vejîyayî, labelê netîce de têkoşîn û qezencê ke dest de estbî, ameyî vînîkerdiş.”
Yewîye do vernîya ci biakero
Guzele dewamê qiseykerdişê xo de wina va: “Do bi yewîya neteweyî heqê kurdan bigirîyo binê temînatî. Yewîya neteweyî seba eşîrêk yan zî keyeyêk rê awan nêbeno. Yewîye seba menfîet û ameyoxa şarê kurdî yena awankerdiş. Yewîya neteweyî tena seba kurdan nê, do vernîya Rojhelato Mîyanênî zî biakero. Ewro Soçî de Rûsya, Îran û Tirkîya yenî têhet û kombîyayîşan virazenî. Ganî kurdî zî vera nêyî de bêrî têhet û yewîya xo awan bikerî. Ewro tecrîdo ke Rayberê Şarê Kurd Abdullah Ocalanî de yeno bicaardiş, vernîya yewîya neteweyî de astengîya tewr gird o. Eke tecrîd bêro wedarnayîş, o wext do na rewşe viraştişê yewîya neteweyî de rolê dînamoye kay bikero.”
MA/AMED