Dîrektora HRWyî ya Tirkîye Emma Sinclaire : “2 serrî ra vêşêr yewna kesî dir pênêdîyayîşê Ocalanî nêno qebûlkerdene. Ewropa rind zana ke Tirkîye de se bena. Naye ra binpaykerdişê heqanê merdiman ê Tirkîye yenê peygoşkerdene.”
Rayberê Şarê Kurd Abdullah Ocalano ke 15ê Sibata 1999î ra nata binê tecrîdêko girankerde de yo, 11ê Êlula 2016î ra nata ti xebere tira nîna girewtiş. Vera tecrîdo girankerde de kurdî bireaksîyon î û çalakîyê tewir bi tewirî yenî viraştiş. Dîrektora HRWyî ya Tirkîye Emma Sinclaire tecrîdê serê Rayberê Şarê Kurdî Abdullah Ocalanî û binpaykedişê heqan yê Tirkîye ser o qisey kerde.
Sinclaire destpêkê qiseykerdişê xo va ‘Verî hîna zaf kurd û dormeyê çepî raştê binpaykerdişê heqan ameyêne, la ewro her hetî ra mexdûrî estê’ û wina dewam kerde: “Heme vengê muxalifî yenê muhakemekerdene. Muxalifê her hetan yenê qedexekerdene.”
Sinclaire ard ziwan ke derbeyî ra dima mabênê 2 û 3 hezarî de leşkerî ameyî tepiştene, êyê ke mendî zî derbekerdişî ra nê, endamîya organîzasyonî ra ameyî muhakemekerdene û wina domnaye: “Zafê nê kesan bi hawayêkê keyfîyî ameyî muhakemekerdene û tepiştene. Zafê dosyayanê merdiman de fealîyetê ‘terorî’ çinyo, la nê kesî zî çarçiwaya mucadeleyê hemverê terorî de yenê muhakemekerdene.”
Seke her çî normal o têgêrenê
Sinclaire dewamê qiseykerdişê xo de nê vatî: “Ma sey Human Rights Watchî hemverê her tewirê tecrîdî de yê. Xusûsen CPTyî xeylî reyan meseleyê tecrîdî de Tirkîye krîtîk kerdêne. Ocalan zî tede seba tepişteyî bieşkê heqanê xo yê sosyalan ra îstîfade bikerê Tirkîye ser o zextî estbî. La ewro nuqteya ke ma resayê ci de seke ma her çîyî kerdo xo vîr ra, nê meseleyî nênê munaqeşekerdene seke nê çîyê normalî bê.”
Binpaykerdişî yenê peygoşkerdene
Sinclaire qiseykerdişê xo de va ‘tecrîd hendî tenya seba Ocalanî nê seba tepişteyanê bînan zî bîyo problemêko xeylî pîl’ û va: “Çende bêveng bimanê zî tayê qayde û standardê CPTyî estê. Di serrî ra vêşêr yewna kesî dir pênêdîyayîşê Ocalanî nêno qebûlkerdene. Ewropa rind zana ke Tirkîye de se bena. Naye ra binpaykerdişê heqanê merdiman ê Tirkîye yenê peygoşkerdene. Çîyê ke Cizîre de ameyî ciwîyayene versîya krîzê multecîyan ê Sûrîyeyijan de mendî. Ma sey sazîya heqanê merdiman ûca se bibi derheqê ci de rapor amade kerd. Dimayo ke derbe ame viraştene reyêk de her çî birîya. Ame waştene ke serê qewimîyayîşanê Cizîre bêro girewtene.”
‘Huqûqê şerî ê herêman de nêvêreno’
Sinclaire peynîya qiseykerdişê xo de nê vatî: “Tirkîye îdîa kena ke huqûqê şerî ê herêman de nêvêreno. Wazena ke sûcê şerî nêrê munaqeşekerdene. Her çende hukmat biccardişanê xo sey ‘mucadeleyê hemverê terorî’ name bikero zî ganî ma çarçiwaya huqûqê merdiman de nizd bibê. Kişîyayîşê sivîlan û hêrişê hemverê cayanê ke herêmê şerî nêyê estbî û nê çîyî zî hetê sazîyanê heqanê merdiman ra ameyî îspatkerdene.”
BERN