23ê Teşrîna verêne ra nata bajarê Strasbourgî yê Fransa de seba weşî, ewleyî û azadîya Rayberê Şarê Kurd Abdullah Ocalanî de çalakîye yena domnayîş. Her roje bi beşdarbîyayîşê cîya-cîyayan çalakîye hîra bena.
Serekê Partîya Çepî ya Ludwîgsburgî Peter Schîmke zî çalakîye zîyaret kerd û tecrîdî ser o qisey kerd. Schîmkeyî va ‘goreyê mi tecrîd şaş û sucê merdimîye yo’ û wina dewam kerd: “Kam beno wa bibo. Hele hele rayber û temsîlkarê şarêkî ser de tecrîd bicaardiş nîno qebulkerdiş. Ganî avûkat û keyeyê xo reyde pêvînayîş bikero. Ma seba ke tecrîd bêro wedarnayîş tîya de yî û destek danî çalakîye.”
Schîmkeyî dewamê qiseykerdişê xo de wina va: “Tirkîya vera heme muxalîfan de kerdişanê bêînsafan bicaana. Ganî heme dinya vera nê îqtîdarê faşîstî de bivindero. Pêkerdişê Merkele û Erdoganî zî tena pêkerdişê înan nîyo. Raştîya xo de pêkerdişêkê sîstemî yo. Nê merdiman ser o bazarî yena kerdiş. Ganî no peynî bibo. Qedexeyê ke Almanya de vera kurdan de estî, nînî qebulkerdiş. Ganî ma vera qedexeyan de têkoşîn bidî. Lazim o demêko rewêr seba wedarnayîşê qedexeyê sembolê kurd û posterê Abdullah Ocalanî bêro wedarnayîş. Çimkî nê tehluke nîyî.”
ANF/STRASBOURG