Rayverê Şarê Kurd Abdullah Ocalan seba pêameyîşî ra û seba azadiya şarî ra yew neynikê û roşnîya dinyayî yo. Şarê kurdan mîyanî de ona Rayver tay vejîyeno.
Yew serrî ra vêşîyo ke Rayverê Şarê Kurd Abdullah Ocalan ra yew xeber çinîya. Hewildayena derbeya 15ê Temmuzî de çi bi û çi nêbe qet yew têkilî û xeber çinî ya. No sebeb ra yo ke heme çî yeno aqilê mezgê merdimî. No tecrîd bi temamî keyfî yo. Keyeyê Ocalanî, merdimê ey û parêzerê ci êşkenê bişorê zîyaret. No Qanûnê Bingeyî de zî bi yew heq o hiqûqî yo û xozayî yo.
Şew û roj payra bime
La mixabin weçînayîşê pêroyine Hezîranî ra dima faşîzma AKP bi rewşa keyfî ra Rayverê Şarê Kurd ser o no tewr tecrît destpa kerd û heyana ewro zî no tecrît rameno. No tecrîtê Îmrali tecrîtê heme kurdan o. Çimkî bi şexsê şarê kurdan ra tecrîtê Îmrali dewam keno. No sebeb ra yo ke heta ke Rayverê Şarê Kurd na rewşa tecrîtî ra nêxelesîyo û azad nêbo, heme kurdî bin tecrît de yê û azad nîyê. Rayverê Şarê Kurd Ocalan seba pêameyîşî ra û seba azadiya şarî ra yew neynikê û roşnîya dinyayî yo. Mîyanê şarê kurdî ra rewa rewe yew Rayver nêvejîno. No warî de şarê kurd bi şans o ke ana wayîrê yew Rayverî yo. No sebeb ra yo ke ganî şarê kurd qedr û qîmetê Rayberê xo weş bizanê û no warî de vengê xo û hesê xo berz bikerê. Sewbîna rewş zî her roj merdişê kurdan o. No sebeb ra yo ke ganî kurdî nê merdişî qebûl nêkerê û seba Rayverê xo şewe û roj payra bê.
Hewnê merdişî îmha yo
Labelê şarê kurd no warî de hema zî hewnê merdişî ra nêwarişto. Hewnî de mendiş qedînayîş û îmhayê kurdan o. No warî de Ocalanî seba azadîya neteweya kurdan ra heme çî kerdo. Senînî ya kurdan viraşta û nê sênî sero heme tewr werdiş û şimitiş esto. Ganî no warî de kurdî zî bizanê ke nê werê xo weş biwerê û nêherimnê. No warî de werdişê sênîya werî zaf zor nîya. Seba tecrît û azadîya Rayver Apoyî ra heme kurd, heme cenî û camêrd, gede eşkenê ke seba Rayver Apoyî ra vengê xo berz bikerê û her roj vejîyê kuçeyan. No tewr çalakî zaf zor nîyo. No tewr çalakî heqê heme kurdan o û bi tewr heqê xozayî yo. Her kes eşkeno ke no heqê xo yo xozayî bîyaro ca.
Qîyametî biqerfnê
Tayyîp heme şarî dawetê teberî, dawetê serhildanî keno. Kurdî zî eşkenê ke no heqê xo yê xozayî bişixulnê. No warî de Tayyîp bi xo Serokkomar o û bi xo dewlet o hema zî şarî ra ardim wazeno û her roj şarî dawetê xoverodayîşê pawitişê xo keno. Ganî heme kurd zî her roj û şewe seba Rayverê xo, xoverodayîşê xo berz bikerê û qîyamete biqerfnê. No warî de seba şarê kurd çîyo ke tewr bi qîmet û xiznaya pîle, şehîdê ci yê. Ganî şarê kurd seba gorê şehîdanê xora wayîr bivejîyo û no warî de zî qîyameta pîle biqerfno. No warî de dinyayî de qet nêwajîya yo ke û pênêhesîya yo ke mezelî yenê bombebarankerdiş û welişnayiş. La nê qetilkarê faşîzma AKP ne merdîyan ra û ne zî goristanê şarê kurd ra hurmetê xo nênawinenê. Seba ke faşîzma AKP tehammulê goristanê şarê kurd nêkeno û ana yena mana kî qet yew tewr zî qîmet û hurmet nêdanê şarê kurd.
Xo sîper bikeme
Ganî no warî de şarê kurd keda û nirxa gorê şehîdanê xora wayîr bivejî yo û xo sîper bikero. Qezaya Licê ya Amedî de Şehîtgehê Hêvîdarê Amed qetilkaranê pîncê AKP nê şehîtgehe rojo ke Licê bombardiman kerde û nê şehîtgeh zî bombardiman kerde. Der û dora nê şehîtgehê û hem dêsî û camî bombardiman kerd û weşanay. Sewbîna zî hema hema heme daristanê deşta Koyê Fîse weşnayî. Amed de seba êrişa gorê şehîdan ra nê hîrê aşmî yo ke nobeta pawitişî kena. La no warî de la çi heyfo ke dezgehî, komelî, sazî zaf hîsigerî nîyê. Merdim kora ra biewnîyo endamê nê komelan hîrsey û çarseyî ra kemî nîyê. La seba nê pawitişê nobeti ra, nê komelan mîyanî zaf taynî merdimî yenê. No tewr zî eybê şerma heme komelan a û bi xisûsî êy eybê û şermê şarî ya. Eke şar nê keda nêrxê û xiznaya xora wayîr nêvejî yo se, sewbîna tewr zî qet yew çîyî ra wayîr nêvejîyeno. No sebeb rayo ke ganî şaristanê Amedî de heme kes seba pawitişê şehîtgehê Hêvîda Amedî ra wayîr bivejî yo û qefleyê girdî ra nobeta xona pîrozî bitepîşo.
ZAZA CEBELÎ