Paytexta Îran Tehran de, vizêr saetanê sodir de 4 hêrîşkaran hêrîşê parlamentoyî, yewî zî hêrişê mezelê lîderê Şoreşa Îslamî yê Îranî Ayetûllah Hûmeynî kerdî. Goreyê xebera Ajansa Tasnîm netîceyê nê hêrîşan de 12 kesan weşîya xo kerd vinî, 39 kesî zî bî dirbetin. DAIŞî hêrîş girewt ser xo. 4 hêrîşkarî amey kiştiş.
Hêrîşkaran çarşef dayê xo ro û bi no şiklî kewtê parlamentoyî. Serokê îstîxbarata Îran Îtlaatî zî da zonayen ke, vernîyê hêrîşeke bîn ame girewtiş. Parlamenterê Tehranê Îlyas Hezretî ke agahî day Medyaya Îranî, da zonayen ke 3 hêrîşkarê ke kewtî mîyanê parlamentoyî ra didiyê ci bi tifinga kalaşnîkof, yewê ci zî bi debance bi. Goreyê tayî çimeyan zî 4 hêrîşkarî kewtê banê parlamentoyî û pirodayîşan de 2 wezîfedarê tîvarî weşîya xo kerdê vinî.
Hêrîşê mezelê Hûmeynî kerdî
Hêrîşeke hemwext zî vera mezelê lîderê Şoreşa Îslamî yê Îranî Ayetûllah Hûmeynî virazîya. Goreyê îdîayan hêrîş hetê cinîyeke ra virazîyayo. Walîyê Tehran diyar kerd ke, hêrîşkareke ser tirbî bombeyê ser xo girêdabî teqna.
DAIŞ ser hesabê xo yê medyaya civakî ra beyan kerd ke hurdî hêrîşî hetê înan virazîyayo.
TEHRAN