Xeylê welatan de tehtîlê dibistanan û yê karî dest pa kerd. Bi taybetî Ewropa ra zafêrê keyeyan bi domananê (qeçan) xo ya şinê welatanê bînan de tehtîlê xo ravêrnenê. Ê ke tehtîlê hamnanî de nêşirê welatna xo de sey kemaneyê vînenê! 

Swêd de zî dibistanî nika tehtîl ê. Sey xeylê miletanê bînan, swêdijî zî hezireya xo ya tehtîlî kenê. Seba ke hamnanê Swêdî yew rey bi varan a ravêreno, swêdijî tehtîlê xo vêşêrî welatanê Deryayê Sipî de ravêrnenê. 

Mi hefteyo verên, rojê baxçeyê keyeyê xo awdayê. Embiryana (cîran) ma Monîka kê ma ver ra ravêrdê, amê mi hete vinderte. Ma serweşey kerde tep ya, va ”şima do no hamnan se kerê, şirê cayê?” Wexto ke tehtîlê hamnanî nezdî beno, hema hema her kes persanê winasînan pê ra pers keno. Mi va ”ez do seba karê şira welat, labelê Sabîha do tîya de bimano. Va, ”şîyayîşê Tirkîya nika bi rîsk nîyo?” Mi va “helbet bi rîsk o, labelê ganî kes baldar bo. Ganî kes zaf nêşiro cayanê turîstan û cayanê qelebalixan.”

Monîka dewam kerd û va, ”ma verî nîyet kerd ke ma şirê Tirkîya, dima ma waz amey. Şîyayîşê Tirkîya hem rîsk o, hem zî ganî kes nêşiro welatêko wahîrê rejîmêko dîktator o.” Hewna mi cewabê ci nêdabi, dewam kerd û va, ”şima mecbûrê şirê, merdimê şima wija de estê. Şima sey turîstî nê, labelê sey hemwelatîyê Tirkîya mecbûrê şirê.” Ez fikirîyaya, na cinêka swêdije, mesela Tirkîya û mesûleteya xo ya însaneyey, kurdê ke Alanya, Marmarîs, Bodrûm yan zî canayê Tirkîya de banê hamnanî herînayê û şinê tehtîl kenê, weşêrî fam kerda. 

Embaze ma yê swêdî yan zî embazê ma yê ke swêd de ciwyenê na persa şîyayîşê Tirkîya, ya seba tehtîlî hema hema her ca de ma ra pers kenê. Mi xeylê embaz û nasanê xoyê ewropayîjan ra aşnawito ke nêwazenê şirê Tirkîya. Tayn seba ke rîsk o, eşkera vanê ”ma tersenê.” Tayn zî, sey Monîka vanê, ”ma nêwazenê bi peranê xo ya hetkareya rejîmê Tirkîya bikerê.”

Winî aseno ke rejîmê Tirkîya, bi polîtîkaya xo ya bêedalet, keyfî, faşîst a bîyo sebeb ke turîstî zaf nêşirê Tirkîya. Goreyê texmînê ”turizmgazetesi.com”î, do serra 2017î de, goreyê serra 2016î, welatanê Îskandînawya (îsveç, Norveç, Fînlandîya, Danîmarka û Îzlanda) ra %28, îngiltere ra %25 û Holanda ra %18 kemêrî turîstî şirê Tirkîya. Helbet nê hûmarî zaf weşvîn ê. Hûmaranê raştayan ma do peynîya sezonê turîzmî de bivînê. Mi gore, hûmara turîstan yê ke her serre şinê Tirkîya do emser hewna kemêrî bo. 


***


Dibistanî kewtî tehtîl, labelê bi des-hezaran a domanî do nêşê tehtîl bikerê. Ê do kuçe û cadan ser o çî biroşê yan zî erdan mîyan de kar bikerê ke hetkareya ekonomîya keyeyê xo bikerê.

Goreyê UNICEFî, tayn welatan de hewna zî 170 milyonî domanî heta 14 saetan kar kenê û qet nêşenê şirê dibistanan û biwanê. Karê ke nê domanî kenê benê sedemê seqetey, nêweşeya ruhî û komelkî. Kişta bîne ra 30 milyonî domanî ya welatê xo de yan zî welatna de mahcîr ê. 

Rewşa domananê Kurdistanî yê domananê nê welatan başêrî nîyo. Perwerdeyo bi ziwanê kurdkî û nasnameyo kurdkî hewna zî qedexe yo. Bi des hezaran a domanê kurdî koçber ê. Bi hezarana domanî kuçeyan de çî roşenê. Xeyalanê nê domanan de tehtîl çin o. 

Bi tewrdê nê problemana zî ez şagird û mamosteyanê kurdkî rê hamnanêdo aram û bi kêf wazena. Boka her çî bi zerrîya şima ya bo!