Qerqizyayişê Îdlîbî û zîyaretê Erdoganî yê Ukraynaye ra pey çapemenîya Rusî, têkilîya El-Nusra û Tirkîya vet werte. Çeteyê El-Nusreyî ke ameyî tepiştiş rolê Tirkîyaye yê ser çeteyan û erşawitiştê lejkerê bi pereyî yê Lîbya ra yew bi yew vatî.

Prosesê Astanaye ra pey Îdlîb de pêkewtişî her ke şî zêdîya, Tirkîya waşt Îdlîb de çeteye EL Kaîdeyî bipawa la bî hedefê bombe varnayişê Surîye û Rusî. Rayedarê Tirkîya vatî ke peynîya bombe varnayişê hêzê Surîye û Rusî 8 lejkerî înan merdî û 9 lejkerî zî birîndar kewtê.

Goreyê xebara lekolin.orgî demê ziyaretê Erdoganî yê Ukrayna, vatişê Erdoganî yê wa silam bibo Ukrayna ra (Slava Ukraine) Rusya de nêrehet viraşt, no ser zî çapemenîya Rusî destpê servîsê xeberê yê balkêşî kerdê. Bi servîskerdişê çapemenîya Rusî, xeber RIA Novostî, TASS û TV Zvezda de zî vejyayî, aşkera bî ke çeteyê El-Nusra ke nêzdê Halepî ameyî tepiştiş, vatî ke ronîyayişê rêxistinê El-Nusrayî de rolê Tirkîya esto.

Polîsê Tirk bi zorî beşdarê El-Nusrayî kerdo

Çeteye El-Nusrayî Mahmud el Najim îfadeya xo de vato ke bi vejyayişê şerê mîyanxo yê Surîye de Artêşê Surîyeya Azade sifte sey muxalefetêka laîk ameyo ronayiş la peynî zî Cepheya El-Nusrayî ronîyayo û mîyanê nê di komê çeteyi de pêkewtiş vejîyayo.    

El Najim îfadeyê xo de vato ke bi malbatê xo Tirkîya ra ramayo la polîsê Tirk bi zorî o beşdarê El-Nusra kerdê û wina vat: “Min ra vatî gere seba înan bixebito û beşdarê El-Nusra bibo. Eke vatişê înan nêko min ra vatî; ya ma malbatê to heme bikişî ya zî ma to tewqîf bikê. Peynî zî min ra 100 Dolar maaş dayê.”

El Najim peynî beşdarê El-Nusra bîyo û malbatê ey zî yew kampî ra ameyo berdiş. El Najim vano ke nika malbatê ey destê dewleta Tirk de rehîne yo û malzemeyî El-Nusrayî ra ameyê heme Tirkîya Erebîstano Suudî ra şîyê.

Hewna endamê El-Nusrayî Huseyîn Abdulazîz zî îfadeyê xo de dîyar keno ke El-Nusra endamê xo yê merdeyî vera pereyî dano şerkerdiş, o zî seba pereyî beşdarê El-Nusra bîyo û wina dewam keno: “Min Artêşê Surîyeya Azade, Tugayê Zinkîyî de zî şer kerd, heme parçeyê El-Nusrayî. Taybetî El-Nusrayî de pakistanij û afganij estbî.”

Çeteyan Lîbya ra kiriştîş

Hewna Ajansê Xebere yê Federalî ke Putînî ra nêzd o, endamê rêxistinî yê El-Nusrayî senî Lîbya ra yenî berdiş ser o xeberêk viraşt û xeber de wina yeno vatiş: “24’ê kanuna 2019’î nika Enqere, 1200 terorîstê surîyeyijî bi korîdoran Lîbya ra resnayo, armancê Tirkîya Lîbya de kaos a, çimkî menfaetê ci Lîbra de estê. Endamê çeteyi 2 hefteyî Tirkîya de kampî ke Îzmîrî ra nêzd ê perwerde girewtî. Peynî zî nê çeteyî bi teyareyê Wîngs û Afrîca Aîrlînesî Lîbra ra ameyî berdiş û teyareyê çeteyan Restayê Teyara yê Mîtîgaye ra resayê. Emîrkerdişê hêzê Tirkîyaye ser o qeydê rota yê teyarayan nêameyî kerdiş, cayî ci pasaportê çeteyan, hetgirê dewleta Tirkîya lîbyayijêk kontrol ameyo kerdiş. Hewna teyarayan de endamê rêxistinî yê Sultan Muradî û bi seyan lejkerê bi pereyi estbîyê, nê çeteyan rayberî zî fermandarê Tirkî kerdê.”

Rolê SADATî

Dewamê xebere de wina yeno vatiş: “Fermandarîya Hêzanê Tirkîya, Serekê Hukamata Mutabakatî ya Netewî (UMH) Fayez El Sarrajî ra girêda lejkeran perwerdekerdişî rê Trablusî ra SADATî ra girêda perwerdekarê lejkerî erşawitê. Hewna 20 heb pisporê lejkerîye, endazyarê têkilîye, programkaran û karmendê personelî erşawitê, seba nê kesan zî SADATî reyde pêameyiş viraştê. Çeteyan ra sozê welatijîya Tirkîyeye ameyo dayiş û hewna çeteyan ra hetê SADATî aşme de 2000 Dolar sozê maaşî ameyo dayiş. Faalîyetê SADATî yê heme zî Katar fînanse kerdo.”

 

ç