XELÎL EL ELÎ / ROJNEWS / TELAFER
Çeteyanê DAIŞî 3ê tebaxa 2014î de hêrişê Şengalî kerdbî û bi hezaran êzidîyî qetil kerdbî. Reyna bi hezaran cinî, camêrd û domanan remnaybî. Çeteyan o wext êzidîyê ke qetil kerdbî, dekerdbî mezelanê komkîyan.
Têkoşînê 4 serran ra dima cayê ke destê çeteyan de bî, tepîya ameyî girewtene. Keyeyê ke merdimê înan ameybî qetil kerdene, seba ke nê mezelê komkî bêrî akerdene, muracatê xeylê cayan kerdbî. Qezaya Telaferî ya Mûsilî de dest bi akerdişê nê mezelan ame kerdene.
Mezelî kontrolê doktoranê Dezgehê Tibê Edlî yê Mûsilî, Ewleyîya Mîyanneteweyî û selahîyetdaranê Mehkemeya Telaferî de yenî akerdene. Goreyê qerarî ewila mezelê komkî yê dewa Kesîr El Mehrabî ame akerdene. Ame musayene ke tîya de pêro pîya esteyê 17 kesan estî. Ame musayene ke esteyê cigêrayîşan ra dima do teslîmê merdimanê înan bêrî kerdene.